Khliehriat, Risaw 03
Ka surok bah NH-6 wat la ka dei ka surok kaba kongsan tam kaba pynïasoh bad kiwei ki jylla ka Thaiñ Shatei Lam Mihngi hynrei ka dei pat ka surok kaba la sniew palat liam bad shah ieh shrah ha ka Sorkar bad ka National Highways Authority of India (NHAI).
Kane ka surok bah kaba la julor bad jot rathai ka dei ha ka thaiñ East Jaiñtia Hills District ha ki bynta jong ka shnong Lumshnong shaduh Ratacherra Malidor.
Ka jingjulor jong kane ka surok ka la long kaba ishyrkhei haduh katta-katta bad kaba buh jingeh ïa ki nongleit jingleit khamtam lei ïa ki nongñiah kali bad kumjuh ruh ïa kiba die dukan harud jong ka surok bad ki khynnah skul kiba ïaid lynti lyngba kane ka surok ki la hap ban bam da ka khyndew pum-pum man la ka sngi. Kane ka buh jingma ym tang ha ka ïaid ka ïeng hynrei wat ïa ka koit ka khiah jong ki paidbah.
La ïoh ban sakhi ba ki la don lei ki bynta jong kane ka surok kiba la buh jingeh haduh katta-katta ïa ki nongñiah kali, khamtam ki nongñiah trok ki bym lah ban pynïaid ha ka shisien ïaid namar ka jingat jingthem haduh ba ka kali ka tyllun biang shadien kaba buh jingma ïa kiwei pat.
Ki bor ba dei peit la ka long ka NHAI ne ki kontrak ba ïoh ïa ka kam ban maramot ïa kane ka surok bad kumjuh ki bor pynïaid district jong ka East Jaiñtia Hills District ki la leh bym salia ïa ka jingshngaiñ ka ïaid ka ïeng ha surok kaba tip kum ka Road Safety, kaba ka sorkar man la u snem ka ju rakhe ban pynsngewthuh halor ka shngaiñ ha ka ïaid ka ïeng.
Dang ha ki khyndiat sngi ba la leit, u District Magistrate jong ka East Jaiñtia Hills District u la pynbna ïa ka Section 163 jong ka BNSS kaba khang pyrshah ban kit palat pud jong ki kali lyngba kane ka surok hynrei kane ka hukum ka khlem treikam satia bad ka jingkit palat pud jong ki kali ka dang ïai bteng haduh kine ki sngi kaba la bynrap ïa ka jingnang sniew shuh shuh jong kane ka surok.
Ki jingkieng ruh ki la tor lut bad paw ki nar bad dap da ka um. Namar ka shi lynter jong ka surok ka la dap satang ki thliew ki syar kiba heh bad lang um kum ki thwei ka la wanrah pat ka jingsniew jong ki kali bad sahkut kali da ki bun bun kynta kaba shimpor bad pynthut shi katdei eh ïa ka ïaid ka ïeng jong ki kali ha kane ka surok.
