Shillong, Risaw 03
Ka skulbah University of Science and Technology Meghalaya (USTM) kaba don ha Ri Bhoi district jong ka Jylla ka la ïoh jingbit ban sdang noh ïa ka jingpule doktor Bachelor of Medicine, Bachelor of Surgery (MBBS) ha ka jaka pule kaba la tei ha kane hi ka skulbah bad kaba la ainam ha ka kyrteng u Lamphang barim ka Ïingdorbar Lok Sabha u Purno Agitok Sangma.
Haba kren sha ki lad pathai khubor ha ka Sngi Palei, ka Myntri ka tnat ka koit ka khiah, ka Kong Ampareen Lyngdoh ka la ïathuh ba ka Sorkar Jylla ka la dep ïakren lypa bad ka USTM na ka bynta ban ïoh phah pule doktor ïa ki samla pule ka Jylla.
Kumta katkum ka jingpynbeit, ka Jylla kan ïoh ban phah pule doktor 40 ngut ha USTM, ha kaba kane ka skulbah kan ïarap ai baibam pura ïa ki 20 ngut katba 20 ngut kiwei pat kin siew mar shiteng.
Ka Kong Ampareen ka la ong ba ka jingpule doktor jong u snem 2024-2025 kan sa sdang noh shen ha kaba ka jingpynbna na ka bynta kane kan sa mih ha ki khyndiat sngi ban sa wan.
Ka Myntri ka la ïathuh ba kane ka jingïoh bhah ka Jylla ïa ka jingpule doktor ka dei lyngba ka jingsoi ïa ka Memorandum of Understanding (MoU) ka ban sa pynlong noh shen.
Haba kylli la ki jingtei jingshna hapoh USTM ki la biang ban sdang ïa ka jingpule doktor, ka Kong Ampareen ka la ong ba ka National Medical Commission (NMC) kan ym ai jingmynjur lada ki jingtei kim pat biang ban sdang ïa ka PA Sangma Medical College ha USTM.
“Lada ka jingbit la ai da ka NMC, ngim don jingartatien ïa ka jingtikna jong ka jingpule doktor ha kane ka skulbah,” la bynrap ka Kong Ampareen.
Ka Kong Ampareen ka la ïathuh ba ka Jylla ka la ïoh bhah lypa ban phah pule doktor 93 ngut man u snem ha kylleng ki jaka pule doktor kiba don ha kiwei ki Jylla bad da ka jingïoh phah pule sa 40 ngut ha USTM, kan long ka jingmyntoi ïa ka Jylla khnang ban ïoh shuh shuh kham bun ki doktor.
Haba kylli lano ka Shillong Medical College kan sdang ïa ka jingpule, ka Kong Ampareen ka la ïathuh ba ha Shillong yn sdang noh ka jinghikai naduh u snem 2025-2026 bad ha Tura Medical College lah ban sdang ha u snem 2027-2028.
