Nongstoiñ, Risaw 04
Ka ïingbishar Special Judge (POCSO) Nongstoiñ ka la rai pynrem da kaba hukum ban set patok haduh 20 snem ryngkat ka daiñ kuna T.20,000 pyrshah ïa uwei u briew uba la donkti ban leh be-ijot ïa kawei ka khynnah ha u snem 2020.
Une u runar uba la shah rai pynrem u dei ba la tip kyrteng kum u Khrawbor Kharmaw ba 24 snem ka rta na ka shnong Porla ha West Khasi Hills.
La ong ba une u runar u la leh ïa kane ka kam pohjait pohrati ha ka 22 tarik Naitung 2020. Kumta na ka liang jong ki bahaïing ki la ujor ejahar ha ka 16 tarik Nailur 2020 ha thanat Nongstoiñ, kiba la register ïa ka case hapoh ka kyndon 3(a)/4 jong ka POCSO Act.
Ka ïingbishar ha ka 27 tarik Nailur 2024, ka la pynmih ïa ka hukum ban set patok haduh 20 snem ïa une u runar lem bad ka daiñ kuna T.20,000 bad lada um lah siew, un hap shong patok sa 6 bnai.
