Tura, Risaw 04
Ha ka step jong ka 3 tarik mynta u bnai, haduh 17 ngut ki nong Bangladesh ba kynthup ïa ar ngut ki kynthei ki la shah bat noh ha ki pulit jong ka West Garo Hills kaba hap hapoh ka thanad Hallidayganj.
Kane ka jingïoh bat ïa kine ki briew ka la long ruh hadien ba 12 ngut ki briew na kane ka ri kaba marjan ki la shah bat ha ki pulit hadien ba ki la rung beaiñ shapoh ka ri kaba la jia ha South West Garo Hills dang ha kane ka taïew.
Katkum ki tyllong khubor ba la ïohlum, kitei ki 17 ngut kiba la rung beaiñ ha katei ka step, ki la shah bat na kawei ka shnong kaba la tip kyrteng kum ka Sobribari, kaba jngai tang kumba katto katne kilometer na ka thanad Hallidayganj katba ki dang wan da kawei ka kali paidbah, ba la kynnoh ba ki la don ha ka lynti ban hiar sha Guwahati bad kiwei ki jaka. Kiba bun ki la pynpaw ba ki la mih ban leit sha Karnataka bad Tamil Nadu na ka bynta ki kam ki jam ki jong ki.
Kine ki khar Bangla kiba la shah bat ki dei kiba la tip kyrteng kum u Sharif Roy (28 snem), Chayan Roy (22 snem), Nahid Sheikh (22 snem), Mizanur Sheikh (19 snem), Habib Sheikh, Alamgir Sheikh (26 snem), Shabbir Sheikh (20 snem), Saidul Islam (25 snem), Shipon Sheikh (35 snem), Maroof Sheikh (26 snem), Amin Sheikh (18 snem), Rajab Ali (18 snem), Kabir Sheikh (38 snem) Md Robiul Islam (38 snem), Kabir Sheikh (32 snem), Shabana Sheikh (22 snem) bad Parul Sheikh (18 snem).
Haba kylli jingkylli da ki nongthoh khubor, kine ki briew ki la kam ba ïa ki la ïarap da uwei u briew na Bangladesh uba la ïarap ruh ban pynshna da ki Aadhar card ba thok na ka bynta jong ki, da kaba oh da ka dor. La ong ba ki la rung sha India lyngba ka khappud ha Dalu ha West Garo Hills bad ïoh ban ïaid sahuh palat 150 kilometer tad haduh ban da shah bat noh ha ki pulit jong ka Hallidayganj.
Hadien ka jingshah weng noh jong ka Myntri Rangbah barim ka Bangladesh, ka Sheikh Hasina, la pynkhlaiñ ïa ka jingpahara ha ki bynta jong ka khappud ban peitngor bad khanglad ïa ka jingwan rung beaiñ jong ki briew kiba dei ki rit paid na Bangladesh na ka jingdon ha ka jingshong syier jong ka jingshah leh beiñ.
