Shillong, Risaw 06
U Working President ka Khun Hynñiewtrep National Awakening Movement (KHNAM) Bah Thomas Passah u la pyntip ba haduh mynta ki la don haduh khathynriew tylli ki konstitwensi kiba la ïoh kyrtong ban ïakhun ïa ka ilekshon MDC na Khasi Hills Autonomous District Council (KHADC).
Haba ïakren bad u Bah Thomas u la ïathuh ba ïa kine ki kyrtong jong ki khathynriew tylli ki konstitwensi, ka State Election Committee jong ka KHNAM kin sa pynbna noh ïa ki kyrteng jong ki kyrtong bad kyrteng jong ki konstitwensi khnang ba kin lah ban dang treikam noh.
U la ïathuh ba kine 16 tylli ki konstitwensi ki don ki kyrtong kiba la pan tiket naduh ar bnai mynshwa bad don kiba dang shu phah shi bnai mynshwa.
U la pyntip ba ka KHNAM kan sa shong CEC noh ha kine ki sngi ban wan ban mynjur ïa ki kyrteng ba la phah da ka State Election Committee bad hadien ba la mynjur ka SEC kan sa pynbna noh ïa ki kyrtong.
“Ngi don jingkyrmen ba ngin pynïeng baroh 29 tylli ki konstitwensi ha ka ilekshon MDC na Khasi Hills Autonomous District Council (KHADC)” u la ong.
Shuh shuh u la ïathuh ba ma u ruh un dei uwei u kyrtong na ki 16 tylli ki konstitwensi ba un ïakhun ïa kane ka ilekshon MDC na Jaïaw konstitwensi.
Ka jingpynkhreh ka KHNAM ban pyllait kloi ïa ki kyrteng jong ki kyrtong kiba la pan tiket ka long ban pynithuh ïa ki paidbah namar la sngewthuh ba ka sorkar kan sa pynbna ha kano-kano ka por ïa ka ilekshon MDC hadien ba ka la dep pynjlan arsien ïa ka samoi treikam ki MDC kiba dei ban kut ha u bnai Rymphang 2024.
