Shillong, Risaw 06
Kum shi bynta ban wanrah ïa ka jingïatylli bad ban ïada ïa ki para Khasi kiba pule ha ka skulbah NEIAH (North Eastern Institute of Ayurveda & Homoeopathy), ka Khasi Students’ Union (KSU) ka la ïoh ban pynkha ïa ka shnat treikam ba thymmai ba la tip kum ka KSU NEIAH Unit.
Ka sur jong ki Samla Pule ha NEIAH ka la pynpaw ba hato ka long kaba biang ba ki Samla Pule kin shu pule thik tang ïa ki kot ba la bthah ïa ki ban pule, ban ïoh ïa ka kyrdan pule, ban ïoh kam ïoh jam bad ban shu khapbrip ngaiñ bad set sbak ïa la ka shyntur bad ki shkor haba ïadei bad kiei-kiei kiba wanrah ïa ka jingsniew ha ka imlang sahlang bad ka jaidbynriew?
Ka 5 tarik u Risaw 2024 kan dei ka sngi sah kynmaw ha kaba ka KSU ka la ïoh ban pynkha ïa la ka tnat treikam ha ka skulbah NEIAH, ïa kaba la pynskhem bad pyntiañ smai da u samla Donald V Thabah, General Secretary ka KSU Sengkmie. Ïa ka jingïalang la pynïaid da u samla Raymond Kharjana (Organising Secretary KSU Sengkmie), bad la sakhi lang da ki nongïalam shnong ba kynthup ïa u Bah Rinelson Suting (Assistant Secretary, Dorbar Shnong Mawkasiang), Bah Wankit Nongkhlaw (Assistant Secretary, Dorbar Dong Mawdiangdiang), Samla Celestine Rynghang (GS KSU Mawkasiang Unit cum member anti-ragging cell, NEIAH), Shelkitbok Kharbani (Assistant Education Secretary, KSU CEC), Sonstar Nongkhlaw (President, KSU Shillong Mihngi Circle), Advocate Hamarbabiang Wanshong (member, Legal Affairs Cell, KSU), Sambormi Lyngdoh (President KSU Laitumkhrah Unit), Jimmy Nongdhar (President KSU Mawkasiang Unit) bad kiwei kiwei.
La pynskhem ïa ki dkhot ka KSU NEIAH Unit ha ïing shnong jong ka Mawdiangdiang bad la ïoh ki jingkren na ki nongïalam ka KSU kiba la kren halor kiba bun ki phang kumno ban ïada bad kyntiew ïa la ka jaidbynriew ha kino-kino ki phang kiba donkam.
Ka KSU ka ngeit skhem ba lyngba ka KSU NEIAH Unit lem bad ka jingkyrshan ka KSU hi baroh kawei, yn pynskhem ïa ka jinglong trai ki samla pule Khasi ha kane ka skul bah bad kumjuh ruh ban peit pyrman ba ki Khasi ba pule bad trei ha kane ka skulbah kin ym shah ban beiñ bad shah leh shiliang ha kane ka skulbah ba la seng ha ka Ri Khasi. La pynkut ka kyrwoh ba la pyllait da ka KSU.
