Shillong, Risaw 06
Ka kynhun pulit State Disaster Response Force (SDRF) kaba la ïoh sei ïa kawei ka kali kaba shah rong namar ka jingshlei ha Dalu Sonagre, West Garo Hills district, ka la lap sa ïa ka met jong ki shikpa-shikhun kiba la shahrong lang bad ka kali.
Ka kynhun pulit SDRF kaba dei na ka tnat Civil Defence & Home Guards, ka la trei shitom bha ha kine ki sngi ban wad ïa ki briew kiba la shah tep namar jingtwa khyndew bad kiba shah rong namar ka jingshlei um ha Rilum Garo.
Ki pulit SDRF ki la lap nyngkong ïa ka kali Wagon R (WB 06 7718) kaba la ngam namar ka jingshlei um ha Dalu Sonagre bad ha kane ka kali, ki don ar ngut shikpa-shikhun kiba shah rong ha ka um.
Ïa ka met jong kine ki shikpa-shikhun la lap ha ka step Sngi U Blei da ki pulit SDRF na kawei ka pynthor kba. Ïa ka met u kpa ba kyrteng u Bijoy S Sangma (44 snem) la lap ha ka por 10:19 baje bad ïa ka met jong u khun ba kyrteng u Wian Chigado R Marak (13 snem) la lap ha ka por 10.48 baje mynstep.
Kine ki shikpa-shikhun ki dei kiba sah ha Rongkhon Songgital, Tura.
Ka kynhun SDRF ka la don lypa ha ki jaka ba shlei ha thaiñ Dalu naduh ka Sngi Thohdieng hadien ba la jur ka jinghap slap lynter.
Ka kynhun SDRF ka la wad ïa kine ki shikpa-shikhun kiba ngam lang bad ka kali ha ka jingshlei um kaba jia ha thaiñ Dalu.
Kum ban pynkynmaw, 10 ngut ki mynsiem briew ki la duh ei tang ha kine khyndiat sngi namar ka jingther slap lynter ha kaba la jia ka jingtwa khyndew bad jingshlei um kaba shyrkhei ha ki lai tylli ki district ka Rilum Garo kaba kynthup ha West Garo Hills district, South West Garo Hills district bad South Garo Hills district.
Hynñiew ngut ki mynsiem briew la duh tang na kajuh ka longïing ha ka jingtwa khyndew ha ka shnong Attesia Songmong ha South Garo Hills district.
