Shillong, Risaw 06
Ka dei ka jingsngew sarong ïa ka jylla ban ïohsngew ïa ka khubor ba u myllung, u nongthoh novel bad u nongthoh drama, u Bah Kynpham Sing Nongkynrih, u la jop ïa ka National Award ka khusnam Shakti Bhatt Literary Prize jong ka Shakti Bhatt Foundation, Bengaluru.
U Bah Kynpham Sing Nongkynrih u la ïoh ïa kane ka nam jop dei hadien ba la bishar bniah ïa ki jingnoh synñiang kiba kongsan jong u sha ka thoh ka tar jong ka ri India (significant contributions to the literature of India) kaba kynthup ïa 34 tylli ki kot ha ka Khasi bad Phareng.
Kine ki kot ki kynthup ïa 10 tylli ki kot poitri ha ka Khasi bad Phareng, 4 tylli ki kot drama, 4 tylli ki kot jingïathuh khana lyngkot ha ka Khasi bad Phareng, 2 tylli ki novel ha ka Phareng, kiba kynthup ïa ka Funeral Nights-‘kawei na ki epic novel ka juk mynta ba bha tam ha ka ri India’-4 tylli ki thup poitri bad jingïathuh khana (national anthologies) ba u la pynbit pynbiang (edit), kiwei de ki kot pule ha ka Khasi bad Phareng bad katto-katne ki kot kiba u la pynkylla ktien sha ka Khasi.
Lah ban batai hangne ba ka novel thymmai jong u ha ka ktien Phareng kaba kyrteng ‘The Distaste of the Earth’ ka la rung sha ka Longlist jong ka JCB Prize, kaba dei ka khusnam ba heh tam ha ri India. Ka Longlist ka dei ka thup ba shiphew tylli ki kot novel ba bha tam ha ka ri ha u snem 2024. Kane ka khusnam ka dang ïaid shakhmat mynta.
U Bah Kynpham u la ïoh ïa ka khusnam Shakti Bhatt Literary Prize ha ryngkat ka song pisa kaba 2 lak tyngka. Kane ka dei ka khusnam kaba la sdang ban sam naduh u snem 2007 ban pynsah kynmaw ïa ka nongthoh kot bad ka Editor ba pawnam, ka Shakti Bhatt. Kane ka khusnam kaba ki sam mynta ka dei ka sien kaba khatsan.
Kum ban shu pynkynmaw hangne, u Bah Kynpham u la ïoh bun tylli ki khusnam namar ka jingshemphang jong u ha ka thoh ka tar. U la ïoh ïa ka Northeast Poetry Award ha u snem 2004 (na Tripura), ka Veer Shankar Shah Raghunath Shah National Award ha u snem 2008 (na ka Sorkar Madhya Pradesh), ka Tagore Fellowship ha u snem 2018 (na ka Indian Institute of Advanced Studies, Shimla), ka Bangalore Review June Jazz Award ha u snem 2021, bad ka Sparrow Literary Award ha u snem 2022 (na ka Sound and Picture Archives of Research on Women, Mumbai). U Bah Kynpham u dei u nonghikai ha ka English Department, North-Eastern Hill University, Shillong.
