Shillong, Risaw 06
Ka jingdon bun palat ki skul ha Meghalaya ka dei kawei na ki daw kaba pynlong ïa ka pule-puthi ba kan nang hiar bad ki don bun tylli ki skul kiba duna bha ka jingwan rung skul ki khynnah, kaba long ka jingduhnong ïa ka Jylla namar la shu pynsyrwa kai ïa ka pisa tang ban siew tulop ïa ki nonghikai.
Katkum ka jingai jingkheiñ kaba ïanujor ïa ka jingdon ki skul ha Meghalaya bad ha kiwei pat ki Jylla kiba marjan ha kane ka Thaiñ Shatei Lam Mihngi, la pyni ba ha Meghalaya ka dei kaba la pynmih bun tylli ki skul khlem nongrim bad haba kheiñlang baroh, ki don haduh 14,588 tylli ki skul ha kane ka Jylla.
Hynrei haba ïanujor bad kiwei pat ki Jylla, ka jingkheiñ ka pyni ba ka Manipur ka don tang 4,844 tylli ki skul, ka Mizoram ka don tang 3,913 tylli ki skul, ka Nagaland ka don ki skul ha baroh kawei ka Jylla tang 2,752 tylli, bad ka Jylla Tripura ka don tang 4,945 tylli ki skul.
Ki skul kiba pynïaid da ki ‘riewshimet ne kynhun shimet ki don 343 tylli ha Tripura, 745 tylli ha Nagaland, 10,25 tylli ha Mizoram bad 1003 tylli na Manipur.
Hynrei ha Meghalaya, tang ki skul shimet ki don haduh 2,637 tylli bad tang ki skul Sorkar ki don haduh 7,778 tylli. Katba ki skul kiba shu ai jingkyrshan lang ka Sorkar ki don 4,173 tylli.
Ka rukom long ka pule ka puthi ha Meghalaya ka dei kaba thamula bha namar ka jingdon bun jait ki skul kum ka nuksa, ki don ki skul Sorkar, ki skul shimet, ki skul adhoc, ki skul deficit, ki skul deficit pattern, ki skul SSA bad kiwei kiwei ki jait skul kiba la seng khlem nongrim.
Ha ka jingpule bniah ïa ka rukom long ki skul ha Meghalaya, la lap ba kane ka rukom pynmih ïa ki skul ha ki bun rukom, ka la pynïapher ïa ka rukom ai jingshakri ki nonghikai namar ki nonghikai kiba trei ïa kajuh ka kam bad kajuh ka rukom hikai, hynrei ki ïapher ka kyrdan bad ka rukom ïoh tulop.
Kaba kham pynlyngngoh shuh shuh ïa ki nongwad bniah shaphang ka jinglong ki skul ha Meghalaya ka long ba, ki skul SSA ha Meghalaya ki dei ruh kiba la ailad ban seng bad pynïaid da ki ‘riewshimet bad kynhun shimet. Katba ha kiwei ki Jylla, ym don satia kita ki skul SSA namar ka SSA ka dei ka skhim jong ka Sorkar Pdeng kaba dei ban pyntreikam ïa ka skhim ha ki skul Sorkar, ym ban seng skul da ki ‘riewshimet.
Tang ki skul SSA ha Meghalaya ki don haduh 5,135 tylli kaba la pynkulmar wat ïa ka Sorkar Pdeng kaba ai ïa kane ka skhim.
Ka jingkylli ka long, mano ba aibor ïa ki MLA bad ki ophisar ka Sorkar Jylla ha kito ki snem ban pyntreikam beaiñ ïa ka skhim SSA da kaba shah ban seng skul ki ‘riewshimet.
