Tura, Risaw 06
Ka jingshlei um ha Ri-lum Garo ka la shim noh sa 5 ngut ki jingim briew ha ki lai tylli ki jingjia bapher-bapher ha ar tylli ki distrik jong ka thaiñ.
Ha ka jingjia banyngkong uwei u nonghikai bad u khun jong u ki la shah rong noh ha ka um katba ki dang pyrshang ban leit sha Tura na SGH hadien ba ka kali jong ki ka la ïakynduh ïa ka umsaw kaba jur kaba la tan noh ïa ki sha ka Wah Bugai kaba don marjan.
Katei ka jingjia ka la jia ha ka janmiet 4 tarik Risaw wat la ïa ki metïap la lap ha ka step Sngi U Blei da ki nongtrei ka tnad Disaster Management bad ki bor pahara jong ka thaiñ.
Katkum ka khubor, la ïathuh ba ha ka Sngi U Blei la ïoh ban sei ïa kawei ka kali na ka tyllong um ha ka shnong Sonagre kaba don hajan Dimapara. Ha kaba sdang, la ïathuh ba ki briew kiba shong ha katei ka kali ki la ïoh ban phet krad hynrei hadien la ïoh jingtip ba ki la jah rngai naduh ka 4 tarik Risaw ha ka por 5:30 baje janmiet.
U nonghikai, u Bijoy S. Sangma, (44 snem ka rta) bad u khun ba dang rit jong u, u Weanchigado R. Marak (13 snem ka rta) na Rongkon Songgital, Tura ki dang wan na Nagrajora, Sempara da ka Wagon-R (WB-06-77718) sha Tura.
Hynrei hadien ba la ïaid lyngba ka jingkieng Bugai RCC bad ynda poi ha ka shnong Sonagre ha ka surokbah NH 217, ka umsaw ba jur ka la rong noh ïa ka kali sha ka um ba jylliew kaba don hajan.
Ïa katei ka kali, la lah ban sei ha ka Sngi U Blei hynrei ki briew ki dang jah rngai bad ka kynhun SDRF ka dang bteng ïa ka jingwad. Ïa ka kali la lap ha ka Sngi Saitjaiñ, ka 5 tarik Risaw ha kaba ki pulit ka WGH ki la pyntikna ba ïa ka met u kpa bad u khun la lap ha ka step Sngi U Blei, 6 tarik Risaw.
Ha ka jingjia ka ba-ar, kawei ka kali kaba dang leit sha Rongjeng, East Garo Hills na Dalu, West Garo Hills ka la julor phom hadien ba u dieng uba na Songsak Reserve u la leit hap halor katei ka kali ha ka janmiet Sngi Saitjaiñ.
Ha kane ka jingjia, u nongñiah jong katei ka kali u la khlad noh ha shen katba 4 ngut kiwei pat kiba shong ha katei ka kali ki la mynsaw jur.
La ïathuh ruh ba uwei u khynnah rit, uba don lang ha katei ka kali, u la mynsaw ha ki bynta jong ka khlieh.
Ïa kitei baroh 4 ngut la pynkit noh mar-mar sha Williamnagar Civil Hospital bad ki dang don hapdeng ka jingsumar.
Ha kawei ka liang, ka jingbteng jong u slap ha Rongjeng, EGH ka la ïalam sha ka jingshah tep im jong ki shikmie-shikhun (kynthei) namar ka jingtwa khyndew kaba la ïalam sha ka jingïap jong ki.
Ïa ka met jong kine 2 ngut la sei ha ka step Sngi U Blei katba katei ka jingjia ka la jia ha ka janmiet 5 tarik Risaw.
Katei ka jingjia ka la jia ha ka shnong Gongdop kaba hap hapoh Rongjeng C&RD Block.
