Jowai, Risaw 06
U Symbud Myntri Rangbah ka jylla, Bah Sniawbhalang Dhar bad MLA ka thaiñ u la leit jurip ïa ka Namdong CHC. Ha kane ka jingleit jurip u la ïakynduh ïa ka Dr Arda Laloo bad kiwei ki doktor kiba trei ha kane ka CHC.
Na ka liang ka CHC ka la aiti da ka jingthoh ïa ki jingduna bad jingdonkam jong kane ka CHC bad la ïamir jingmut ruh hapdeng ki nongtrei ka CHC, ki nongïalam shnong bad u Symbud Myntri Rangbah na ka bynta ban pynbha bad ban pynbiang ïa ki jingdonkam jong kane ka CHC.
U Bah Sniawbhalang u la ong ba un shimkhia ban pynbiang bad pynbha ïa ka jingdonkam ha kane ka CHC naduh ki doktor, ki staff nurse bad kiwei kiwei ki nongtrei. U la kular ruh hakhmat ki doktor, ki nongïalam shnong, ki ‘riew rangbah ka thaiñ ba un shna noh da ka surok rong ban poi sha CHC ban ai kawei Ambulance, kumjuh ban ai rong noh ïa ka building bad baroh ki quarter jong kane ka CHC.
U la kyntu ruh ïa baroh ki nongtrei ba kin trei hok bad ba kin don ha ka kam (duty) bad ban don ka jingïatreilang hapdeng ka CHC bad ki bor shnong khnang ba kan wanrah ka jingmyntoi ïa ki paidbah ka thaiñ hi baroh kawei.
Hadien kane u la leit peit ruh ïa ka jaka na ka bynta ban shna ïa ka ophis jong ka Namdong C&RD Block bad u la ïathuh ruh ba yn pyntrei kam pura ïa ka Namdong Block khnang ba ki paidbah kim donkam shuh ban leit sha Thadlaskeiñ Block, hynrei ki shnong kiba hap hapoh Namdong Block kin pyndep kam ha ka block lajong hi.
Ïa u Symbud Myntri Rangbah la synran da u waheh shnong ka Namdong Bah DS War bad Secretary Shnong Bah Serus Lipon, ki nongïalam shnong bad ki ‘riew rangbah kane ka thaiñ.
