Shillong Risaw 06
U Rakkam A Sangma uba dei u Myntri ka Sorkar Jylla ha ryngkat bad u MLA ka Chokpot u Sengchim N Sangma ha ka Sngi U Blei, ki la leit sngewlem bad ïakynduh ïa ki bahaïing bahasem jong kawei ka longïing kaba la duh noh ïa hynñiew ngut ki mynsiem briew na ka jingshah tap ha ka khyndew kaba la twa kynsan.
Katei ka jingjia kaba sngewsih ka la jia ha ka shnong Hatiasia Songma kaba ha South Garo Hills District ha ka por 7 baje mynstep jong ka 4 tarik mynta u bnai.
U Myntri Sorkar bad u MLA ki la leit jurip ïa katei ka jaka bad ki la pynpaw ïa ka jingsngewlem sha ki bahaïing bahasem bad ki la ïakren ruh bad ka kynhun NDRF.
La ïathuh ba namar ka jingtwa kynsan jong ka khyndew baroh kiba don ha katei ka ïing ki la khlad noh na ka jingshah tap ha ka khyndew ha kaba tang ïa ka tnum ïing ruh ym lah ban ïohi shuh.
Ki hynñiew ngut kiba la khlad noh ki kynthup ïa ka Silji R Marak (60 snem), ka Merina R Marak (39 snem), u Sama N. Sangma (50 snem), ka Chengbe R Marak (22 snem), u Desrang R Marak (14 snem), ka Silbera R Marak (8 snem) bad i Dimse R Marak ba dang don shi snem shiteng.
