Shillong, Risaw 06
Ki runar bym lah ban ithuh ki la ïoh ban rong tuh ïa ki pipe um nalor kiwei pat ki tiar ba bun kiba shong dor da ki phew hajar tyngka bad kumjuh ruh kawei ka kali na kawei pat ka jaka.
Katkum ka khubor ba la ïoh na ki pulit la ong ba ka Kong Theisara Pariat ka la ujor ba ha ka 1 tarik mynta u bnai, ki runar bym lah ban ithuh, ki la ïoh rah tuh ïa khyndai tylli ki pipe nar, ar tylli ki tyrnem, ka water pump, ki waïar tama, laiphew ar tylli ki nar rod bad kiwei kiwei ki tiar ba shongdor haduh kumba T.59,580/- na Laitkor Mawrie Lumheh ha East Khasi Hills.
Ha kawei pat ka khubor na ki pulit la ong ba u Ajay Agarwal u la ujor sha ki pulit ba ha ka 2 tarik mynta u bnai, ha ka por kumba 12 baje mynsngi, ki runar bym lah ban ithuh, ki la tuh ïa ka kali Maruti Eeco ka jong u, kaba don ïa u registration number ML05-Z-0475 na ka thaiñ Rilbong, Shillong.
Ha kaba ïadei bad kine ki jingshah tuh na ka liang jong ki pulit hadien ba ki la ïoh pdiang ka jingujor, ki dang pynlong ka jingtohkit ban lap ïa ki jingshisha bad ruh ïa ki briew kiba donkti ha kane ka kam.
