Shillong, Risaw 06
Ka jinghap slap lynter ha kine ki khyndiat sngi, ka la ktah shi kat dei ïa ka Rilum Garo khamtam ha ki lai tylli ki district tang ha kine ki khyndiat sngi.
Ki lai tylli ki district kiba la shah ktah bha ki long ka West Garo Hills district, South West Garo Hills bad South Garo Hills.
Tang ha ka 4 tarik bad 5 tarik, kaba jur bha ka jinghap slap, la sakhi ïa ka jingshah ktah jong 54 tylli ki shnong ha kaba ki nongshong shnong kiba shah ktah ki long 4,954 ngut bad 330 tylli ki longïing kiba shah ktah.
Hynrei ki ïing kiba shah pynjulor ki long 58 tylli, bad ki mrad kiba la ïap ki long 10 tylli.
Ki jingtei jingshna kiba shah ktah bha ki dei ki surok namar ka daw ka jingtwa khyndew bad jingshlei um kaba la jynrat ïa ki jingkieng bad surok ruh kumjuh.
Tang ki surok kiba la shah pynjulor ki long 18 tylli, kawei ka PHC, kawei ka sub centre, kawei ka skul bad kawei ka muri bad ka pung.
