Shillong, Risaw 06
Ki nonghikai hapoh ka shatri jong ka All Meghalaya SSA School Teacher’s Association (AMSSASTA) kiba dang shong jingïakhih mynta ha madan Malki ki la rai ba kin dang pynjur shuh shuh ka jingïakhih tang mar shu kut ka shuti puja.
Haba ïakren bad u Bah Peter Thyrniang uba dei u President, u la ïathuh ba ka jingïakynduh ki nonghikai ha ka sngi Saitjaiñ ki la rai ban bteng ka jingïakhih tad haduh ban da ïoh da ka jingthoh ne khot ïakren na ki bor sorkar.
U la ïathuh ba kane ka jingshim rai ki nonghikai ka dei hadien ka jingwan ïakynduh u Bah HM Shangpliang, u nongaibuit ka tnat pule puthi ka jylla ban sangeh noh ïa ka jingïakhih hynrei ki nonghikai kin ym sangeh tad haduh ban da ïoh da ka jingthoh ïa ki mat jingdawa.
U la ïathuh ba ki nonghikai kin dang bteng ban shong ha madan Malki wat la hapdeng ka shuti puja hynrei ki la rai ban pynjur ïa ka jingïakhih hadien ka shuti puja namar baroh ki nonghikai ha Meghalaya kin wan ha Shillong.
Shuh shuh u la pyntip ba kine ki jingïakhih kiba kham tyngeh yn sa pynbna paidbah ynda ki nonghikai ki la wan lut na rilum Garo khnang ban pynbor ïa ka sorkar kaba la sngap mynthi ïa ka jingdawa.
Kum ban shu pynkynmaw ka jingdawa ki nonghikai SSA ka long ban pynkiew tulop 100 persen bad kiwei kiwei ki jingdawa.
