Khliehriat, Risaw 07
Ka ophis District Horticulture Officer ka East Jaiñtia Hills ryngkat ka jingïatreilang ka Quinquennial Review Team (QRT) of Central Citrus Research Institute (CCRI) ha ka 7 tarik Risaw ka la pynlong ïa ka jingjurip ïa ki kper sohniamtra jong ka shnong Narwan ha East Jaiñtia Hills District ban bishar bniah ïa ka ka daw jong ka jinghap soh ba ki nongrep ki mad.
Ka kynhun jong ka QRT ka kynthup ïa u Vice-Chancellor of Horticulture and Forestry University, Nagpur u Dr. Dhillon, u Director barim ka ICAR-NRC, u Dr RK Pal, ki stad saian kiba kynthup ïa u Dr H Rymbai, Dr. ES Marboh, Dr. AK Das, Dr SK Milra, Dr PK Chakraborty, Dr AN Ganeshmurthy bad Dr Darshan Kadam.
Ha kane ka jingleit jurip la don lang ruh u Assistant Director ka tnat Horticulture, East Jaiñtia Hills District u Bah SR Mulieh, u ophisar ka District Horticulture, East Jaiñtia Hills District, u Bah DB Dhar, ki ophisar ka tnat Horticulture, ka Kong B Rymbai bad u Bah N Shylla ki nongïalam shnong bad ki nongrep jong ka thaiñ Narwan.
U District Horticulture Officer ka East Jaiñtia Hills District u Bah DB Dhar u la pynpaw ka jingsngewnguh ïa baroh ki dkhot ka QRT jong ka CCRI da kaba pyntip ruh ïa ki jingeh ha kaba ïadei bad ka jinghap sohniamtra ne Khasi Mandarin jong ka shnong Narwan.
U Bah Dhar u la pyntip ruh sha ki dkhot jong ka QRT ba ki nongrep sohniamtra (Khasi Mandarin) jong ka Narwan ki khmih lynti ïa ki dkhot jong ka QRT ban ai ki lad ki lynti kiba donkam bha ïa ka jingeh jong ka jinghap soh kaba ki mad mynta.
U Vice-Chancellor ka Horticulture and Forestry University, Nagpur u Dr RS Chandel haba ïakren bad ki nongrep sohniamtra jong ka Narwan u la ong ba ka kynhun jong ka Quinquennial Review Team ka kut jingmut ban wad ïa ka daw tynrai jong ka jinghap ki soh da kaba pynpaw ruh ïa ki lad ki lynti kiba ki nongrep ki lah ban pyntreikam ban pynmih ïa ki soh kiba bha.
