Shillong, Risaw:
U Bah PT Sawkmie, MLA barim u la pynpaw ba ka Mawlai Konstitwensi ka donkam ïa ki MLA bad MDC ki bym dei na kajuh ka seng saiñ hima, khnang ba kin lah ban kyntiew ïa ki kam pynroi hapoh ka thaiñ; kaba mut u MLA na kawei ka seng bad u MDC na kawei pat.
U Bah Sawkmie u la pynpaw ïa kane ha ka sngi ba u la aiti ïa ki tynghung pyrta shnong ne PA System kiba kynthup ïa 8 tylli ki tynghung (horn) bad u mouth piece sha ka Dorbar Shnong Mawlai Umthlong ha ophis treikam jong ka ha ka 05 tarik u Risaw, 2024.
U la pynpaw ruh ïa ka jingsngewkmen ba ki paidbah nong Mawlai ki dang kynmaw ieit ïa u wat la um long eiei shuh.
“Hadien ba ka Dorbar Shnong Mawlai Umthlong ka la wan ïakynduh ïa nga bad pynsngew halor ki jingdonkam ïa ki PA System, nga ruh kum u nongmihkhmat barim ba don ïa ka jingsngewkhia, ha i bor barit nga la lah ban pynïoh ïa kine ki tiar da ka jingkyrkhu jong U Blei,” ong u Bah Sawkmie.
Katba na ka liang u Assistant Rangbah Shnong, Bah Lamphrang Mylliem Umlong u la pynpaw, ba nalor ki tynghung ba u Bah Sawkmie u la ai, 70 persen na ki kam pynroi hapoh shnong Mawlai Umthlong ka dei ka matti Bah Process.
Kumjuh ha kane ka sngi u Rangbah Shnong Bah Shaphrang Mylliem Umlong uba ïeng ban kren na ka bynta ka Dorbar Shnong Mawlai Umthlong u la ai khublei bad pynpaw ïa ka jingsngewnguh ïa u Bah PT Sawkmie uba la pynïoh ïa kine ki tiar pyrta shnong kiba ki donkam bha na ka bynta ban ai jingtip ïa ki nongshong shnong halor ki jingdonkam ka shnong.
Ha kajuh ka por u la kubur ruh ïa ka jingong u Assistant Rangbah Shnong ba 70 persen ki kam pynroi hapoh shnong ki dei ki matti Bah PT Sawkmie ha ka por ba i long nongmihkhmat.
Ha kane ka jingïalang balyngkot la ïoh ruh ïa ka jingkren na ka President seng longkmie Mawlai Umthlong ka Kong P Khongwar ha ka jingdon ryngkat ki dkhot seng longkmie, ki dkhot dorbar shnong bad kiwei kiwei.
