Tura, Risaw 07
Ka jinglong-jingman mariang kaba ki nongshong shnong ka Ri-lum Garo ki la mad ha kine ki khyndiat sngi ba la dep ka la sdang jai-jai hadien ba u slap u la sdang ban duna.
Hynrei ka jingbym pat hiar pura jong ka um, kiba bun ki dang sahkut sah ha ki jaka ai jingïarap bapher-bapher ha ki lai tylli ki distrik ka Ri-lum Garo kiba la shah pynjulor ha kine ki lai sngi ba la dep.
Ki lai tylli ki distrik kiba la shah ktah jur – South Garo Hills, West bad South West Garo Hills kim shym la ïoh slap shuh, ha kawei ka liang kaba la ailad ïa ki kam ai jingïarap ban tyllun shakhmat. Hynrei ki dang don bun tylli ki shnong kiba la shah pyndkut ki lad pynïasoh bad kiba dang mad jingeh haduh mynta.
Katba ki jingtip ba ïadei bad ki jingkheiñ na ka bynta ka South Garo Hills kim pat don, ki bor distrik ki la ïaid shakhmat ban pyntikna ba baroh kin shah kynthup lang haba pynbiang ïa ki lad jingïarap.
Katkum ki kaiphod ba ïoh lum, u Deputy Commissioner ka WGH, u Jagdish Chelani u la pyntip ba ym duna ïa 8000 ngut ki briew ha kylleng ka Dalu C&RD Block ki la ïoh ïa ki lad jingïarap.
Ha kajuh ka por, ka jingdon jong kito kiba shah ktah ka lah ban nang kiew naba ïa ki jingpynïasoh sha katto-katne ki jaka ym pat lah ban pynbiang.
“Ngi la ai san sngi ka GR sha kito kiba shah ktah bad ngin sa ai ruh ïa ki jaiñ ki nep namar kine ki long kiei kiba ki paidbah ki donkam. Ki jaiñ kin poi sha Dalu lashai ka sngi bad hadien kata yn sa sam ïa ki. Ym don mano-mano ruh ba la pynkhreh halor kaei kaba la jia hynrei ngi la leh katba lah ban pyntikna ba ym don mano-mano ruh kiba shah iehnoh,” la pyntip u DC.
Ka South Garo Hills kaba la shah ktah jur tam na baroh ki distrik ka la sakhi ïa ki jingpyrshang lad ai jingïarap kiba la ïaid shakhmat wat la ym pat lah pynbiang pura ïa ki lad pynïasoh.
“Ka kam ba hakhmat eh jong ngi ka long ban pyntikna ïa ka jinglap jong ki metïap jong kito kiba la khlad noh ha ka shnong Atisia Songmong. Ka kynhun ka la pyntikna ba la sei ïa 6 na 7 tylli ki metïap bad ka jingwad ïa ka met kaba khatduh kan sdang lashai ka sngi. Ka NDRF lem bad kiwei-kiwei ki kynhun ki don ha katei ka jaka ban pyntikna ïa kane,” la pyntip u DC ka SGH, u Richard Yanthan.
U Yanthan u la bynrap shuh-shuh ba la ai jingïarap ïa ki briew na baroh ki C&RD Block katkum ka jingdonkam ban ïoh biang ïa ka jingim kumba ju long.
“Ngi dang lum ïa ki jingtip halor ka jingdon jong baroh kiba shah ktah bad ïa kane ngi khmih lynti ba yn sa ïoh lashai ka sngi. Kiba bun ki jaka ki dang mad jingeh namar ka jinglong-jingman halor kaei kaba la jia hynrei ngi dei ban wanphai biang sha ka jingman bha ha kine ki khyndiat sngi ban wan. Nga kyrpad ïa baroh ban wan shakhmat lada don kano-kano ka jingdonkam ïa ki tiar jingïarap namar baroh ngi donkam ban ïawan lang ha kum kane ka por,” ong u Yanthan.
Ha SWGH, ka jinglong-jingman ka la jan wanphai biang sha kumba ju long wat la ki bor distrik ki dang bteng ïa ka jingkyrshan sha kito kiba shah ktah lyngba ka GR. Palat 2500 ngut ki briew ki la shah ktah hapoh kane ka distrik.
