Shillong, Risaw 07
Ka Voice of the People Party (VPP) ha ka Lah Sngi U Blei ka la leit ban buh da ka dorkhas bad ujor ha u Commissioner and Secretary ka tnat Pule Puthi u VK Mantri halor ka jingpynslem ban ai jingïarap ïa ki nong-hikai kiba la khlad noh bad kiba la shongthait na ka kam.
Ka VPP ha kane ka jingïakynduh ka la pynpaw ïa ki jingeh kaba kum ki nonghikai ki ïakynduh kynthup ka jingbym ïoh ïa ka Death cum Retirement Gratuity (DCRG) kata na ka bynta ki nonghikai kiba la shongthait ne kito kiba khlad noh shiteng por.
Ki Nongïalam ka VPP ki la pynpaw ba ïa kane ka jingïarap song pisa na ka liang jong ka Sorkar kam shym la lah ban pyllait ryntih haduh mynta bad la suba ba ka don ka jingleh shiliang khmat, kata ïa kiba mon ka Sorkar ka la pyllait bad ïa ki bym mon pat kam pat pyllait.
Ha kane ka jingleit buh dorkhas ba la lam-khmat da u Bah Bright-starwell Marbaniang, MLA ka Mawlai, la ïa-donlang u Dr. Batskhem Myrboh, u Dr. Kara H Chen bad kiwei kiwei.
Haba kren sha ki lad pathai khubor u Bah Brightstarwell u la ong, ba don na ki nonghikai kiba dang shu shongthait na ka kam ki kloi ban ïoh ïa ka jingïarap song pisa kaba T.10 lak na ka sorkar hynrei la shem pat ba ki don bun na ki nonghikai ki la hap ban ap haduh 4 ne 5 snem tam ban ïoh ïa katei ka song pisa. Nalor kane ki la don ruh sa kiwei pat de ki jingpynsngew sha u Commissioner ba u dei ban pynbeit kyrkieh.
U Bah Brightstarwell u la ong, ki nonghikai hadien ba ki la shongthait ne ki khlad noh shiteng por, ki dei ban ïoh ïa ka jingsiew ne ka song pisa ba T.10 lak kaba long shisien na ka Sorkar hynrei ki don kiba khlem pat ïoh satia bad don pat tang katto-katne kiba la ïoh.
Une u MLA ka Mawlai u la ong ba ha kaba ïadei bad kane, na ka liang jong ka Sorkar ka dei ban pynbeit mardor bad ban peit ba ka jingsiew ne pyllait pisa ka dei ban long ryntih ïa baroh ki nonghikai kiba la shongthait.
U la pyntip ruh ba na ka liang u Nongïalam jong ki, u la dep ban rah bad kren ïa kane ka mat hapoh ka ïingdorbar bad ha kaba na ka liang u Myntri Rangbah ruh u la ong ban shimkhia ïa kane, hynrei haduh mynta ka dang sah kumjuh.
Ha kawei pat ka liang, u Bah Brightstarwell u la pynpaw ruh ïa ka jinglyngngoh halor ka jingïapher ka rukom siew tulop sha kito ki nonghikai kolej naba haba ki rung kum ki nonghikai ka long beit thik katkum ka ‘sanction post’ hapoh ka University Grant Commission (UGC) bad ka jingsiew ruh ka dei ban ïaid katkum ka UGC hynrei ïa kine ki nonghikai la siew tulop pynban katkum ka State Pay Scale.
U la ong ba katkum ki kyndon jong ka UGC, kam shym la don satia ka jingkhang ne buh rta na ka bynta ka kam nonghikai Assistant Professor bad la jied ïa kito kiba tbit ïa ka kam, hynrei hangne pat wat la ïaid katkum ki kyndon UGC, la buh pat da ka rta ba ym dei ban palat ïa kata ka rta kaba la buh. Namar kata, Ka VPP ka dawa ba dei ban weng noh ïa kane ka kyndon ban buh rta na ka bynta ka kam nonghikai.
Une u MLA ka VPP u la ong nalor kane, la dawa ruh ba ka Sorkar ka dei ban ai ïa ka increment ne ka jingpynkiew jingsiew ïa kiba la pyndep ïa ka jingpule PhD.
Ka seng ka la pyrshah ruh ïa ka rukom pynïaid ïa ka eksamin Assistant Professor in Physical Education, namar kaba sngew lyngngoh ka long ba ka DHTE ka la khot ïa ki nongpynïaid na ka tnat ïalehkai kaba long pyrshah ïa ka kyndon jong ka UGC kaba la buh ba ïa ki nongpynïaid ki dei ban long ki stad na ka NEHU ne na ki skulbah.
