Shillong, Risaw 07
U MLA barim jong ka Ranikor Konstitwensi u Martin M Danggo uba dei ruh u Lamphang barim ka ïingdorbar thawaiñ ka jylla bad ruh u Myntri barim, u la mih noh na ka Bharatiya Janata Party (BJP).
Ka jingmih noh jong u Martin M Danggo ka la long ha ka Lah Sngi U Blei lyngba ka shithi kaba u la phah sha u State President jong ka BJP Meghalaya, ban pyntip ba u la iehnoh ïa ka jinglong kum u dkhot ka BJP.
Ha ka shithi sha u State President ka BJP Meghalaya, u Martin M Danggo u la pyntip ba ka jingmih noh ka jong u na ka BJP ka dei hi na ka daw shimet bad u la kyntu ïa u President ban pdiang ïa ka jingmih noh ka jong u.
