Tura, Risaw 07
Ar ngut ki khynnah rit ki la duh noh ïa la ka jingim hadien ba ki la syntuid bad hap ha kawei ka thliew paiñkhana (septic tank) katba ki dang muja ka ïalehkai.
Katkum ka khubor kaba la ïoh lum la ong ba kane ka jingjia ka la jia ha ka Sngi Saitjaiñ ha ka shnong Bate Apal-Bangsi Apal ha North Garo Hills. Kine ar ngut ki khynnah rit ki dei ba la tip kyrteng kum i Silarin R Marak ba dang 8 snem bad i Tangme R Marak ba dang 3 snem.
La ong ba kine ar ngut ki khynnah katba ki dang ïa muja ban ïalehkai habar ïing, ki la syntuid bad hap sha kane ka thliew kaba la tih ban shna paiñkhana, bad namar ka jingdap bad shlei um, ki la ngam jyllop. Ka jingdap um jong kane ka thliew ka dei namar ka jingther jong u slap ha kine ki sngi ha ka thaiñ rilum Garo, kaba la wanrah ïa ka jingshlei um, ka jingtwa khyndew bad bun kiwei ki jingjulor kiba la ktah shibun ïa ki nongshong shnong.
