Shillong, Risaw 07
Ka Meghalaya Rural Tourism Forum (MRTF), kawei na ki kynhun kaba don bynta ha ka kam jngohkai, ka la kyrpad ïa ka Sorkar Jylla ban phah tuklar lang ha ka Airport Authority of India (AAI) ban ai jaka lem ïa ki nongñiah tourist taksi na Meghalaya kiba ju kamai ban leit ap ïa ki nongleit jingleit na ka Kad Liengsuiñ ha Guwahati ban wan kit sha Shillong namar bunsien kine ki nongñiah kali tourist ki hap ban siew beit ïa ka pisa lada ïoh briew ne khlem ïoh briew ban kit na ka kad liengsuiñ ha Guwahati sha Shillong.
Ka MRTF ka la pynsngew ïa kane lyngba u Chairman, Bah Allan West Kharkongor sha u Myntri ka tnat jngohkai ka Jylla u Bah Paul Lyngdoh ha ka jingïakynduh mynta ka sngi ha Secretariat ha ka Lah Sngi U Blei.
U Bah Allan u la ong ba kane ka jingmad jingeh jong ki nongñiah kali kamai ha Kad Liengsuiñ ha Guwahati ka dei namar ka jingbym don ka jaka pynïeng kali ha kaba man ki kali kiba rung sha kane ka kad liengsuiñ ban leit ap briew, ki hap beit ban siew pisa la kumno-kumno T. 200 tyngka shikynta, bad haba kam biang ka jingkamai, kam dei kaba suk ban siew ïa kata ka pisa. Kumta u la ong ba kiba bun ki kali tourist na Meghalaya ki shu ïeng sharud shakiar namar ki tang shu rung sha kad liengsuiñ, ki la hap ban siew beit ïa ka pisa.
U Bah Allan u la ong ba lada lah ban pynïoh ïa ka jaka ïeng kali ïa kiba na Meghalaya, lehse yn lah ruh ban tem ïa kine ki jingïakhih kiba ki nongñiah kali ki ju pynsngew namar ki don ka hok ban pynsngew khamtam haba ki shah pyndik haba ki leit kamai sha kad liengsuiñ ha Guwahati. Kumta u Bah Allan u la ong ba ka dei ka kamram jong ka Sorkar ban khmih ïa kane namar lada lah ban pynbeit kan long ka jingbha lang ïa baroh ym tang ïa kiba leit kamai sha kad liengsuiñ ha Guwahati hynrei ïa kiba don bynta ruh ha ka kam jngohkai namar ki nongñiah kali ki dei lang shibynta jong kiba trei ha ka kam jngohkai.
