Shillong, Risaw:
Ka tnad Ministry of Skill Development and Entrepreneurship (MSDE) ka la lah ban pynlong da kaba jop ïa ka lympung jingïalang halor ka phang “Northeast Skill Development and Entrepreneurship Conclave 2024” ha IIM Shillong ha kine ki khyndiat sngi ba la lah. Kane ka lympung ka dei ka sienjam ban kyntiew ïa ka jingseng kam lajong bad ka jingpyntbit ïa ki sap ki phong ha ka thaiñ Shatei-lam-Mihngi ka India.
U Jayant Chaudhary, Myntri khynnah ka sorkar pdeng uba peit ïa ka tnad ym hapoh jong u Myntri heh ne (Independent Charge), ka tnad Ministry of Skill Development and Entrepreneurship bad u myntri khynnah ka tnad pule puthi ka sorkar India u la long u kongsan ryngkat bad kiwei ki khlieh nongïalam na kylleng ki jylla ka thaiñ Shatei-lam-Mihngi, ki ‘riew shemphang ki kam karkhana, ki stad ha ka thoh ka tar, baroh ki la ïashim bynta lang ban ïakren bad ïatai kumno ban pynkhlaiñ ïa ka thaiñ da kaba wanrah ïa ki lad ki kabu kiba thymmai.
Kane ka lympung ïatai ka kynthup ïa ki jingïakren shaphang ka jingïatreilang jong ki jylla ka thaiñ da kaba pynbeit ïa ki sienjam treikam jong ki jylla ba kin long kiba katkum ka jingthmu jong ka tnad treikam ka sorkar pdeng khnang yn pynkhlaiñ ïa ka jingseng kam lajong bad wanrah ïa ka lad ban pyntbit ïa ki sap ki phong. Ka jingïakren ka phai khmat shaphang kumno ban wanrah ïa ki lad ki lynti ban nang kham pynjanai shuh shuh ïa ki sap ki phong jong ki samla ha ka thaiñ lyngba ki lad bad ki jinghikai ban kyntiew ïa ki sap jong ki bad ban kyntiew ïa ka jingseng kam lajong, da kaba phai khmat bha ha kaba ïadei bad ki sienjam ki ban ïarap ban kyntiew ïa ka thaiñ. Ka jingthmu jong kane ka jingïatreilang ka long ban wanrah ïa ka ïoh ka kot kaba ïaineh ha ka thaiñ Shatei-lam-Mihngi.
