Shillong, Risaw 07
Ka jingshah tuh jong ki mar ki mata bad ki ar shaka ka dang ïai bteng na kawei ka sngi sha kawei pat bad tang ha kine ki sngi ruh ka la don biang ka jingshah tuh ksiar na kawei ka ïing bad ki ar shaka na ki jaka bapher bapher.
Katkum ka khubor kaba la ïoh na ki pulit la ong ba uwei u nongshong shnong jong kawei ka dong ha nongbah Shillong u la ujor ba ha ka 3 tarik mynta u bnai, ki khaila ksiar kiba dei jong ka kurim jong u, kiba shongdor kumba T.1.5 lak, ki la jah na ka ïing sah jong u.
Ha kaba ïadei bad ka jingjah jong kine ki khaila ksiar, na ka liang une u nongujor u la suba jur ba ka lah ban dei ka briew ba trei ha ïing jong u.
Ha kawei pat ka khubor, ka Susana Hek ka la ujor sha ki pulit ba ha ka 3 tarik mynta u bnai, ka la lap ba ki runar bym lah ban ithuh ki la tuh ïa ka ar shaka jong ka kaba don ïa u registration number ML05-A-4353 na ka phyllaw jong ka ïingsah ka jong ka, kaba don ha Golf Links Pdengshnong, Shillong.
Ha kawei pat ka khubor, u Tengbath B Marak u la ujor ba ha ka 2 tarik mynta u bnai ki runar bym lah ban ithuh ki la tuh ïa ka ar shaka jong u kaba don ïa u registration number ML13-A-4329 na ka shnong Hatibasa ha North Garo Hills.
Kumjuh ruh u Salsrang D Marak u la ujor tang da ka ktien ba ka janmiet jong ka 4 tarik mynta u bnai, ki runar bym lah ban ithuh ki la tuh ïa ka ar shaka jong u kaba don ïa u registration number ML14-7494 na ka shnong Chelapara kaba hap ha South West Garo Hills.
