Shillong, Risaw 07
U MLA ka Pynthorumkhrah u Bah Alexander L Hek uba long ruh u Myntri Sorkar Jylla u la pynshai ba ka jingpaw jong ka jingdon ka dak orpait ha ka jingkieng kaba dang shna thymmai hajan jong ka BDW International School ha Nongmensong, kam dei satia ka jingorpait jong ka jingkieng hynrei ka dei tang ka muri.
Lah ban pynkynmaw ba ha ka Sngi U Blei ba la dep, ki pulit pynïaid kali ki la pynbna ba kam long shuh kaba shngaiñ ban ïaid na ka jingkieng kaba don hajan ka skul BDW International hadien ba la lap ba kane ka jingkieng ka la orpait.
Wat la ka la don ka jingkhang ïaid kali ba shipor ha ka Sngi U Blei, hynrei na ka liang jong u Bah Hek u la pynthikna ba kam shym la don shuh ka jingkhang bad la shah ban ïaid kali na kane ka surok, ha kaba wat ma u ruh ha ka Sngi Nyngkong u la ïaid lyngba kane ka surok.
U Bah Hek u la pyntip ba ka jingmaramot ïa ka kynroh bad ka muri kan shimpor kumba 4 ne 5 bnai. U la pyntip ruh ba na ka liang jong ki karikor ruh ki la wan hiar mar mar sha kane ka jaka mar ïa ïoh jingtip ban peit ïa ka jinglong-jingman bad ong ruh ba ka jingtrei ïa ka kam ha kane ka jaka ka dang ïaid.
U la ong ba lada dei ba ka jingtrei ka la dep pura, te lah ban kdew kti ne kynnoh hynrei kumba long mynta, haba ka kam ka dang ïaid, ym lah ban kynnoh ïano-ïano ruh la ïa u kontraktor ne ki karikor.
