Shillong, Risaw 08
Ka kynhun jong ki samla kiba la dep ban thoh ïa ka eksamin jong ka kam Staff Nurse ki la mih biang shakhmat ban leit buh da ka jingthoh ha ka ophis treikam jong ka DHS ban pynsngew sa shisien pat ïa ka jingbym ïaid beit ka rukom pynïaid ïa ka eksamin ba la dep jong ki Staff Nurse kaba don kumba 164 tylli ki kam.
Kane ka jingmih jong kine ki samla shakhmat ka dei ruh namar ka jingbym hun ha ka rukom pynmih ïa ka resol namar la ïohi ba ki la mih shibun ki jingbakla (resol). Na ka liang jong kitei ki samla pule ki la kynnoh ruh ba ka la don ka jingbym ïaid beit-ïaid ryntih ha ka rukom pynïaid ïa ka eksam bad ban pynmih ïa ka resol da kaba ong ba ka jingai ïa ki jingkylli ruh ka dei na shabar jong ka kot pule ne ka ‘syllabus’.
Haba ïoh ban ïakren bad u samla Lurstep Nongrum, u la ong ba ki samla kim pynpaw ka jingpyrshah ïa ka rukom pynïaid ïa katei ka eksam, ne ban don kano-kano ka jingbishni ïa kiwei pat ki samla hynrei u la ong ba ka jingdawa jong ki, ka dei ba ka tnad DHS ka dei ban pynbeit ïa ki kynrum-kynram bad ban pynshai halor ka jingmih ki jingbakla.
U samla Lurstep u la ong ruh ba na ka liang kine ki samla kin aipor kumba 24 kynta ïa ka Sorkar ba kan peit ïa ki jingkylli kiba na ka liang jong kine ki samla ki la ong ba ki dei ki jingkylli na shabar jong ka kot pule.
Utei u samla u la ong ruh ba lada ka tnad DHS kam lah ban pynshai eiei halor kane ka bynta hapoh ka 24 kynta, ka dei ban pynsangeh shisyndon ïa katei ka eksamin kaba la dep ban pynlong. Nalor kane ka la dawa ruh na ka Sorkar ba ka dei ban thung da ka ‘Independent Inquiry’ ne ka jingtohkit laitluid ban tohkit bniah halor katei ka mat namar ba ka jingïakren jong ki bad ki bor pynïaid kam dei shuh ha ka sien kaba nyngkong hynrei ka la dei da bunsien da kaba bynrap ba kane kam dei shuh ka jingbakla hynrei lehse, ka dei ka jingleh khnang.
“Ngi kwah ïa ka jingpynshai halor kine ki jingkylli bad kata ka dei ban long hapoh ka 24 kynta bad lada kim lah ban leh ïa kata, ngi dawa ïa kaba kin pynsangeh noh shisyndon ïa katei ka eksamin jong ki Staff Nurse, nalor kane ngi kyrpad ruh ïa ka Sorkar ba kan thung da ka ‘Independent Judicial Inquiry’ halor jong kane ka rukom thep kam-thep jam”, ong u samla Lurstep.
Shuh-shuh utei u samla u la ong ruh ba lada lap ba ki don kino-kino kiba donkti ha kaba ïadei bad ka jingleh bakla bad ka jingleh beaiñ halor ka rukom pynïaid ïa katei ka eksam, ka Sorkar ka dei ban pynshitom bad weng kam shisyndon ïa kum kitei ki briew.
Na ka liang jong kitei ki samla ki la pynshai ruh ba kim don kano-kano ka jingpyrshah ïa kiwei pat ki samla kiba dawa ba dei ban pynïaid shakhmat ïa kane ka kam khamtam haba ïadei bad ka jingmih jong ki ha ka Lah Sngi U Blei jong ka 7 tarik u Risaw 2024 lyngba ki lad pathai khubor.
