Tura, Risaw 08
Ha kawei ka jingjia ba sngew shyrkhei, uwei u samla ba 23 snem ka rta na ka shnong Dolbaoara u Ponibirth R. Marak u la shoh ïa la u kñi, u Jengran R. Marak halor ka jingsuba men-ai-ksuid kaba hap hapoh ka jingpeit jong ka Purakhasia Outpost ha ka janmiet 7 tarik Risaw.
Ïa kane ka jingjia la pyntip noh sha ki pulit ha ka janmiet Lah Sngi U Blei ha ka por kumba 7:10 baje eiei da u Rangbah Shnong ka Rohonpara ha ryngkat uwei pat u nongshong shnong na kane kajuh hi ka shnong. Une uba la khlad ruh u dei na kane ka shnong.
Katkum ki khubor ba la ïoh lum, u Ponibirth u la wan sha ïing jong utei u rangbah ha kaba u la kynnoh men-ai-ksuid shuwa ban shoh ïa u da u ‘pipe’ um (nar) kaba la ïalam sha ka jingïap u kñi jong u (u Jengran) ha katei ka jaka.
Hadien kane, u la phet krad noh na katei ka jaka hynrei hadien la kem noh ïa u da ki nongshong shnong ka Rohonpara.
Na ka liang ki pulit ki la kurup noh ïa ka tiar ba la pyndonkam ban pynïap na une uba shah kynnoh donkti shuwa ban rah pat ïa u sha Purakhasia PHC ban leh eksamin.
Ha ka jingleit jngoh ïa katei ka jaka, la lap ïa ka metïap jong utei u briew sha lyndet ïing jong u.
“Ha ka jingtohkit, la lap ba utei uba shah kynnoh donkti u la suba ba u kpa jong u, u don ka jingpang bad u kñi jong u (uba shah pynïap) u dei ka daw halor jong kane,” ong ka kaiphod jong ki pulit.
Namar ka jinglip bording, ym shym la lah ban pyndep ïa ka jingdonkam haba ïadei bad ka met bad la pynkynriah noh ïa ka sha Tura Civil Hospital ban leh ïa kaba donkam.
Utei uba shah kynnoh donkti ha katei ka kam u la shah kem noh ha ki pulit.
