Jowai, Risaw 08
Ka District Medical and Health Officer, West Jaiñtia Hills, Jowai lyngba ka National Health Mission ka la sam Android Tablet sha ki ASHA bad ASHA Facilitator jong ki lai tylli ki Block ka West Jaiñtia Hills District.
Ïa ki Android Tablet la sam da u MLA ka Jowai bad Chairman ka MUDA Bah Wailadmiki Shylla ha ka jingïalang kaba la long ha District Library Auditorium, Mynthong ha ka 8 tarik Risaw.
Nalor u MLA la donlang ruh u Deputy Commissioner ka West Jaiñtia Hills District Bah BS Sohliya, IAS, ryngkat ki ophisar ka koit ka khiah kynthup u Dr. K Dhar, District Medical & Health Officer, Jowai, Additional DMHO Dr. Rapki Shullai, District Health Manager National Health Mission bad u Dr. H Niang BDO jong ka Thadlaskein C&RD Block.
U Bah Wailadmiki ha ka jingkren u la pyrto ïa ka jingaiti lut bad ka jingtrei shitom jong ki nongtrei ASHA, da kaba ban jur ïa ka bynta ba kongsan ba ki don ha kaba kyntiew ïa ka koit ka khiah jong ki paidbah.
U la ai khublei ïa ka jingtrei shitom jong ki ASHA naduh ban buddien ïa ka koit ka khiah jong ki longkmie bad khyllung, kumjuh ban pynsngewthuh ïa ki longkmie ba kin leit kha khun sha ki hospital, ban pynkynmaw ruh ïa kiba don khun rit ba kin leit phah injek haba la dei ka pali ban injek nalorkata ban pynsngewthuh ruh shaphang ki skhim ai jingsumar bapher bapher jong ka sorkar.
U MLA u khmih lynti ba ka jingwanrah ïa ki tablet Android, ki nongtrei ASHA mynta kin lah ban pyndep ïa ki kamram jong ki da kaba kham suk bad ban pynbiang ïa ka jingshakri da kaba suk bad thikna da kaba u ngeit ruh ba kane ka sienjam kan kyntiew ïa ka rukom sumar jingpang ha baroh kawei ka thaiñ.
Ïa ka Thadlaskeiñ C&RD Block la shakri tang da kawei ka CHC (Community Health Centre) bad lai tylli ki Public Health Centre (PHC) kiba la kyrshan da ki 170 ngut ki ASHA.
Ka Laskein C&RD Block ka don kawei ka jaka sumar paidbah CHC bad phra tylli ki jaka sumar paidbah, ba la kyrshan da ki 100 ngut ki nongtrei ASHA kiba don ka bynta kaba kongsan ha kaba pynpoi ïa ka jingshakri ba kongsan ha ka koit ka khiah sha ki paidbah.
