Shillong, Risaw 08
Ka jingshah tuh jong ki arshaka bad ki kali ka dang ïai bteng na kawei ka sngi sha kawei pat bad ïa kane lah ban sakhi lyngba ka jingshah tuh manla ka sngi na ki jaka bapher bapher.
Katkum ka khubor kaba la ïoh na ki pulit la ong ba ka Nobia R Marak ka la ujor ba ha ka 4 tarik mynta u bnai ha ka por dang 3 baje mynstep, ki runar bym lah ban ithuh ki la tuh ïa ka arshaka jong ka, kaba don ïa u registration number ML13-A-6387 na ka shnong Dobakol ha North Garo Hills.
U Grikborn R Marak ruh u la ujor sha ki pulit ba ha ka 4 tarik mynta u bnai ha ka por 3 baje mynstep, ki runar bym lah ban ithuh ki la tuh ïa ka arshaka jong u, kaba don ïa u registration number AS18-L-7571 na ka shnong Dobakol ha North Garo Hills.
U Jimstenly G Momin ruh u la ujor ba ha ka 3 tarik mynta u bnai ha ka por 1 baje shiteng synñia, u la lap ba ka arshaka jong u kaba la pynïeng ha ka shnong Berubari ha North Garo Hills ka la jah rngai.
Kumjuh ruh na ka liang jong u Parmeswar Rabha u la ujor sha ki pulit ba ha ka 5 tarik mynta u bnai ha ka por kumba 4 baje mynstep, ki runar bym lah ban ithuh ki la tuh ïa ka arshaka jong u, kaba don ïa u registration number AS18-L-0159 na ka jaka sah jong u ha New Miapara ha North Garo Hills.
