Shillong, Risaw 08
U Bah Paul Lyngdoh uba dei u Myntri ba khmih ïa ka tnat Jngohkai u la pyntip ba hapdeng jong u Naiwieng, na ka liang jong ka Sorkar kan sa lah ban pyndep noh ïa ka jingpynkynriah ïa ki nongshong die madan na ka thaiñ Khyndai Lad.
Haba kren sha ki lad pathai khubor ha ka Sngi Ba-ar, u Bah Paul u la pyntip ba ka jingpynkynriah ïa ki nongdie madan ha Khyndai Lad kan dei ha ka bynta ba nyngkong (First Phase) katba ha kiwei-kiwei ki jaka kum ka Laitumkhrah bad kiwei kiwei yn sa leh kham hadien ha ka Bynt-II.
U Bah Paul u la pyntip ba ka jingpynleit jingmut jong ka Sorkar mynta ka long ba pyndep noh ïa kane ka kam kaba ïadei bad ki nongshong die madan bad pyntip ruh ba ki don ki jaka ba kyrpang ha ki jaka khaïi ba la buh beit thik tang ïa ki nongdie dukan madan.
“Mynta ngin sa pynbna noh ïa ki jaka shong dukan madan (vending zone) bad ha ka bynta ba nyngkong, ka dei ka Khyndai Lad bad ka bynta ba ar ka dei ka Laitumkhrah, kin dei shibynta na kane ka kam” u la bynrap bad pyntip ruh ba ki don hapdeng 200 haduh 250 ngut ki nongshong die madan ki ban sa shah pynkynriah.
Ha kajuh ka por, u Myntri u la pyntip ruh ba ka Sorkar ka don jingthmu ban ai da ki permit ïa ki nongshong die madan bad ban sdang ïa ka kam ha kaban pynlong pat ïa ka Khyndai Lad kum ka jaka ïaid kjat u paidbah hadien ba la dep pynkynriah ïa baroh ki dukan die madan.
Shuh shuh u Bah Paul u la pyntip ba haduh mynta ki la don lai tylli ki jaka kiba la dep ban ithuh da ka Sorkar na ka bynta ban ai jaka ïa baroh kito ki nongshong die madan kiba la pyndep ïa ki jingdonkam baroh katkum ba la buh da ka tnat Pynroi Sor.
Haba kylli pat halor ka jingdon ki nongdie madan ba khlem pat pynrung kyrteng, u Myntri u la pynshai, “Ka jingpynrung kyrteng ka la ïaid mynta la shisnem. Ki don ki kyndon ba la buh shai bha da ka Sorkar bad kito kiba pyndep ïa kine ki kyndon, kin don ha ka thup ba la ithuh kum ki nongshong die madan bad tang kine kin ïoh ïa ka jingïarap na ka Sorkar”.
