Shillong, Risaw 08
U Myntri Rangbah ka Jylla, u Conrad K. Sangma ha ka Sngi Ba-ar u la leit jngoh ïa ki jaka ba shah ktah namar ka jingtwa khyndew bad jingshlei um ha ka thaiñ Dalu, West Garo Hills bad Atisia Songmong ha South Garo Hills.
U Sangma u la ïakynduh ruh ïa ki bahaïing jong ki lanot kiba la khlad noh na ki jingjia twa khyndew ha ki shnong bapher-bapher kiba hap hapoh Dalu C&RD Block ha West Garo Hills.
Ha kajuh ka por, u la aiti ïa ka jingïarap pisa kaba mar T.4 lak sha ki bahaïing jong kito kiba la khlad noh na ki jingjia twa khyndew bapher-bapher ha kine ki khyndiat sngi ba la dep.
U Sangma u la pynpaw ruh ka jingsngewlem bad jingsngewsih halor kitei ki jingjia lynshop kiba la ïalam sha ka jingduhnoh ïa ki mynsiem ba kordor ha kitei ki jingjia ba sngewsih.
Ha Rongkhon Songgital, Tura, u Myntri Rangbah u la aiti ïa ka jingïarap pisa (T.8 lak) sha ka kurim jong u Bijoy Marak – u nonghikai ha kaba ka kali jong u ka la shah rong noh ha ka umsaw bad kaba la shim noh ïa ka jingim jong u bad u khun jong u, u Wian Chigado R. Marak ha ka 4 tarik Risaw.
Ha ka shnong Karonggre, Dalu, u Sangma u la ïakynduh ïa ki bahaïing bad aiti ïa ka jingïarap pisa kaba T.4 lak sha ka ïing jong ka Sanira Marak (18 snem ka rta) kaba la khlad noh namar ka jingtwa khyndew.
Kumjuh, ha ka shnong Sorokpara kaba don ha Dalu, u la leit jngoh ïa ki kmie ki kpa kiba don hapdeng ka jingsngewsih kthang jong u Miando P. Marak (5 snem ka rta) uba la khlad noh ha ka jingjia twa khyndew katba u dang ïalehkai shadien ïing ha ka 4 tarik u Risaw.
Na ka liang u Myntri Rangbah u la pynpaw ruh ka jingsngewsih kaba khraw haba ïakynduh ïa ki kmie ki kpa namar ka jingduh noh ïa la u khun.
Haba phai pat sha Tibapara kaba hap hapoh Dalu, u Sangma u la leit jngoh ïa ka ïing ka sem jong u Tengseng R. Marak uba la khlad kyndit namar ka jinghap kynsan jong u dieng halor ka kali jong u ha Songsak.
Nalor kane, u la leit jngoh ruh ïa ki bahaïing jong ka Santa Marak kaba la shah tep im ha ka jingtwa khyndew ha ka shnong Koinabhui kaba ha Dalu. Ka Marak la iehnoh shadien ïa ka khun jong ka, ha kajuh ka por kaba la mynsaw namar katei ka jingjia.
Ha kawei ka liang, u Sangma u la leit jngoh ruh ïa ka longïing jong ki 7 ngut kiba la shah tep im namar ka jingtwa khyndew kaba la rong noh ïa ka ïing ka sem bad ïa ka jingim jong ki ha ka shnong Atisia Songmong kaba hap hapoh Gasuapara, South Garo Hills.
Hadien kane, u la ïaid kjat ruh kumba 2 km ban poi ha ka jaka ba jia katei ka jingjia.
Shuh shuh u la aiti ïa ka jingïarap pisa jong ki 5 ngut na ki 7 ngut na kajuh ka longïing sha u Watison Marak bad na ka bynta ki 2 ngut ki lanot ba dang sah ha u Baseng Momin, uba la duh noh ïa la ka kurim bad u khun shynrang ba dang shisnem shiteng.
Na ka liang u Myntri Rangbah u la ïashim bynta lang ruh ha ka jingïalang duwai kaba la pynlong na ka bynta ki lanot ha katei ka shnong bad sngap ruh ïa ki jingud jingnam jong ki paidbah.
