Mawkyrwat, Risaw 08
Kawei ka jingjia kaba kham phylla ka bym pat ju jia koit kaba la jia ha Mawkyrwat ha kaba ki doktor jong ka Civil Hospital Mawkyrwat ki la lah ban sei ïa ka shyieng khlieh dohkha dohkha kaba eh bad kaba long pyllun kaba heh kumba 2 inshi eiei kaba la sahkut ha ka ryndang jong uwei u rangbah.
Une u rangbah uba la ïoh nguid ïa kane ka shyieng khlieh dohkha u dei u Bah Golddenstar Khar Syiemiong na ka shnong Jakrem, South West Khasi Hills District.
Katkum ka jingïathuh u Bah Golddenstar uba trei ha ki thaiñ Ranikor u la ïathuh ba ïa kane ka dohkha la ïoh ban khwai da ki paralok jong u bad haba la ïa bamja miet, u la kum nguid lang ïa kane ka kynja snep dohkha bad nyngkong u mutdur ba dei u shiah bad u la pyrshang ban dih da ka um bad bam da ka ja tylli ruh hynrei kam mih satia kumta u la leit phah peit noh ha PHC Ranikor bad ki doktor ki la phah noh sha Civil Hospital Mawkyrwat.
Haba la poi ha Civil Hospital Mawkyrwat, ki doktor ki la leh test bad ki la lap ïa kane ka shyieng khlieh dohkha kaba la sahkut ha ryndang u Bah Golddenstar bad da ka jingtrei shitom ki doktor bad ki nurse hapoh ka jingïalam u Dr. Daniel Suting ryngkat ka kynhun, ki la lah ban sei noh ïa kane ka shyieng khlieh dohkha na ryndang jong une u rangbah.
Haba ïakren bad u Dr. Daniel Suting u la ïathuh ba kane ka jingjia kaba u lap mynta ka dei ka jingjia kaba um pat lap mynno-mynno ruh bad kaba dang thymmai bad ka dei ka sien ba nyngkong eh kaba kum ka jaka sumar ka la shim bad ka jingsumar ruh ka la long kaba jop wat la ki tiar ki tar ban leh test bad pyndonkam ïa kum kine ki jingjia ki dang duna shibun.
U la ïathuh ruh ba kumba long mynta u Bah Golddenstar Khar Syiemiong u don hapdeng ka met ba koit ba khiah bad u la lah ban bamja kumba ju long bad sa tang shisngi ar sngi un sa ïoh ban mih noh na ka jaka sumar.
U la kyntu ruh ïa kiwei ki nongpang ba kim dei ban artatien ban wan phah sumar ha Civil Hospital Mawkyrwat namar ka la long ka jaka sumar kaba paka ban ai jingsumar ïa ki paidbah khamtam kum ka jingpang kaba u la shem.
