Shillong, Risaw 09
U Myntri Rangbah ka Jylla, u Conrad K. Sangma, ha ka Sngi Balang u la bteng ïa ka jingleit jngoh jong u ïa ki jaka ba shah ktah na ka jingshlei um bad jingtwa khyndew ha ki bynta bapher-bapher jong ka Ri-lum Garo.
U Sangma ha kane ka sngi u la leit jngoh ïa ka Chokpot Civil Sub-Division ha South Garo Hills, kumjuh ïa ka shnong Reni Badimagre, ha kaba u la jurip ruh ïa ka jingkieng halor ka Wah Dareng kaba pynïasoh ïa ka Reni Badimagre sha Bibragre kaba la twa namar ka jingshlei um.
Ha kawei ka liang, kam shym la don kano-kano ka jingshah ktah ïa ki nongshong shnong na ka jingshlei um ha ka shnong Reni Badimagre.
Na ka liang u Myntri Rangbah u la leit jngoh ruh ïa ka skul Mt. Carmel hajan Ïew Chokpot kaba la shah ktah ha ka jingshlei um ha kaba wat la ka ïingmala kam shym la julor hynrei ki tiar ki tar kum ki kot, ki miej ki shuki ki julor lut. U Sangma u la leit jngoh ruh ïa ki ïing kiba shah pynjulor ha Bibragre, Chokpot bad ha kane ka thaiñ, ki don 20 tylli ki longïing kiba shah ktah ha ka jingshlei um bad 9 tylli ki ïing kiba la shah pynjulor.
Ha kajuh ka por, la sam ïa ki lad jingïarap (GR) sha baroh 20 tylli ki longïing kiba shah ktah.
Haba phai sha ka shnong Rongrakgre, u Myntri Rangbah u la ïakynduh bad ki longïing kiba shah ktah ha ka jingshlei um bad baroh ki don 38 tylli ki longïing kiba shah ktah bad 24 tylli ki ïing kiba la shah pynjulor. Ki bor ba dei khmih ki la pynbiang ruh ïa ki lad jingïarap sha baroh ki longïing kiba shah ktah.
U Myntri Rangbah u la ïakynduh ruh bad ki briew na ki ar tylli ki shnong ba shah ktah ha ka jingshlei um, kata ka Gonganggre bad ka Danggilgre. Ha kine ki shnong ki don 27 tylli ki longïing kiba shah ktah bad 10 tylli ki ïing kiba la shah pynjulor – la pynbiang ruh ïa ki lad jingïarap sha baroh kiba shah ktah.
Kumjuh, u la leit jngoh ïa 7 tylli ki longïing kiba la shah ktah bad 3 tylli ki ïing kiba la shah pynjulor ha ka shnong Daramgre. Shuh shuh u Sangma u la leit jngoh ïa ka madan ïalehkai ha Daramgre kaba la shah ktah namar ka jingshlei um bad kular ban pynkhuid ïa ka khyndew da ka jingïarap ka tnad PWD.
Nalor kane, u leit jngoh ruh ïa ki nongshong shnong ba shah ktah ha ka shnong Rongrikkimgre bad jurip ïa ka jingkieng halor ka Wah Dareng (kaba la sah rong noh ha ka um) kaba pynïasoh ïa ka shnong Rongrikkimgre sha Dikronggre.
Ïa kane ka jingkieng la shna da ka BADO bun-bun snem mynshuwa.
