Shillong, Risaw 09
Ka Voice of the People Party (VPP) ka la ban jur halor ka jingkhmih bniah ïa ki kyndon lad jingpynkhreh ba ïadei bad ki jingjia lynshop khnang ban pyntikna ïa ki lad jingïarap kiba sted bad paka ha ka por ba wan jia ki jingjia ba kyrkieh.
Ka seng ha kajuh ka por ka phah ka jingsngewlem sha ki bahaïing bahasem jong kito kiba la duh noh la ka jingim ha ka jingshlei um kaba dang shen ha Ri-lum Garo.
“Ka jingduh noh ïa 17 ngut ki mynsiem ba kordor, kynthup ïa u kpa bad la u khun ba dang rit, kumjuh ki shi kmie shi khun (kynthei) ka long ka jingpynkynmaw ka ban pynpyrkhat halor ka jingdonkam ba kyrkieh na bynta ki lad jingpynkhreh ba kham bha bad ka jinglah ban shah jong ki jingtei ha ka Jylla jong ngi,” ong u nongaiktien ka VPP, Dr. Batskhem Myrboh ha ka kyrwoh khubor.
Ha kajuh ka por, u la ai jingïaroh ïa ka jingtrei shitom jong ki bor distrik, kynthup ki nongtrei ka tnad Disaster Management, kiba la minot khlem shongthait ban pynbiang ïa ki lad jingïarap sha ki paidbah kiba shah ktah ha kitei ki jingjia.
Ha kawei ka liang, u la pynpaw ka jingsngewkhia halor ka jingpynslem ban pynbha pat ha ki katto-katne ki jaka, khamtam ha kaba ki shnong ki dang mad jingeh namar ka jingjulor ki jingtei bad ka jingbym biang ki lad pynïasoh.
Haba kdew ba ki dang don shibun kiei-kiei kiba hap ban leh, u Dr. Myrboh u la ong ba ka seng ka kyntu ïa ka Sorkar MDA hapoh ka jingïalam ka NPP ban shim ïa kane ka kabu bad ban pyrkhat halor ki jingduna haba phai sha ki lad jingïarap haba wan jia kum kine ki jingjia – kaba buh jingeh ïa kiba bun ki nongshong shnong bad ban long marwei ne shah iehnoh ha ka por ba ki donkam eh.
“Ka jingbteng ha ka jingbymbiang ki lad pynïasoh bad ka leit ka wan ha ki katto-katne ki distrik kiba shah ktah jur, kum ka South Garo Hills, ka kdew ïa ka jingbym larkam jong ki Sorkar kawei hadien kawei ban pynlut ha ki jingtei kiba neh bad kiba lah ban ïaishah ïa ki jingjia ha ka jinglong-jingman ka jingkylla suiñ bneng,” u la ong.
Na ka liang ka seng ka la ban jur halor ka jingpynbha ba mardor ïa ki kam ai jingïarap khnang ban pyntikna ba ym don kawei ruh ka longïing (ba shah ktah) kaba shah ieh noh khlem ka jingkyrshan, khamtam ha ki jaka ba kyndong bad kiba eh ban poi.
Shuh shuh u la bynrap, “Ka jingpynbha ïa ki jingtei ba pura ha Ri-lum Garo, ba kynthup ïa ki surok ba kham bha, ka jingshna ïa ki jingkieng, bad ki rukom ban ïada na ka jingshlei um ban kiar na kum kine ki jingjia ba sngewsih hadien-habud.”
Nalor kine, ka seng ka la ban jur ruh halor ka jingkhmih bniah ïa ki kyndon ba ïadei bad ki lad jingpynkhreh na bynta ki jingjia lynshop ban pyntikna ïa ka jingïarap kaba sted bad kaba paka ha ka por ba don ki jingjia ba kyrkieh – da kaba pynleit jingmut kyrpang halor ki rukom ai jingmaham ba kloi bad ki lad pynkynriah.
