Shillong, Risaw 09
Ka jingshah ktah ka Rilum Garo ha ka jingshlei um bad jingtwa namar ka jingjur slap ha kine ki khyndiat sngi ka la jur palat khamtam ha West Garo Hills district bad South Garo Hills district.
Tang ha West Garo Hills district, ki nongshong shnong kiba la shah ktah ki long 6,28,319 ngut bad 622 tylli ki ïing katba ki ïing kiba la julor ki long 93 tylli.
Ha South Garo Hills district, ki nongshong shnong kiba shahktah ki long 16,975 ngut bad ki don 23 tylli ki ïing kiba shahktah, hynrei ki ïing kiba shah pynjulor ki don haduh 244 tylli.
Ki shnong kiba shah ktah ha ki district bapher bapher ki long 133 tylli ha West Garo Hills, 79 tylli ki shnong ha South Garo Hills, 12 tylli ki shnong ha East Garo Hills, 3 tylli ha North Garo Hills, 15 tylli ha South West Garo Hills, 4 tylli ha Eastern West Khasi Hills, 1 ha East Khasi Hills. Baroh ki shnong kiba shah ktah ki long 246 tylli ha kine ki district.
Ha East Garo Hills district, ki don 9 ngut ki briew kiba shah ktah bad kawei ka ïing kaba shah pynjulor. Ha South West Garo Hills, ki don 4,970 ngut ki briew kiba shahktah bad ki ïing kiba la julor ki long 8 tylli. Ha Eastern West Khasi Hills, ki briew kiba shah ktah ki long 800 ngut bad 20 tylli ki ïing ki a shah ktah hynrei ym don ki ïing kiba julor.
Ha East Khasi Hills, ki don 10 ngut kiba shahktah, bad kawei ka ïing ba julor.
Baroh ki briew kiba shahktah ki long 6,51,083 ngut bad 665 tylli ki ïing kiba shah ktah bad baroh ki ïing kiba shah pynjulor ki long 347 tylli.
Kiba khlad baroh ki long 15 ngut, 5 ngut ha West Garo Hills, 7 ngut ha South Garo Hills bad 3 ngut ha East Garo Hills. Kiba mynshwa ki long 6 ngut. Ki mrad kiba ïap ki long 10 tylli bad 2000 tylli ki dohkha.
Ki bor district ki la buh haduh 69 tylli ki jaka sah shipor (relief camp) na ka bynta ban pynsah ïa ki briew kiba la shah ktah jur ha kaba 68 tylli ki jaka sah ki dei kiba la buh tang na ka bynta ki briew ka thaiñ Dalu kumba 17,000 ngut.
Kawei pat ka jaka sah shipor kaba la buh ka dei ha Chokpot bad ki don 32 ngut ki briew kiba sah. Baroh ki briew kiba hap sah ha ki jaka sah shipor ki long 17,032 ngut.
