Shillong, Risaw:
Ka Hynñiewtrep National Youth Front (HNYF) Southern Border Area ha ka 8 tarik u Risaw 2024 ka la leit ban ïakynduh ïa u MLA ka Mawsynram Konstitwensi u Bah Ollan Sing Suiñ bad phah ruh da ka jingthoh sha u MLA ka Ranikor Konstitwensi, u Bah Pius Marweiñ bad sha ka Deputy Commissioner (DC) ka East Khasi Hills District, ka Kong RM Kurbah ban dawa weng noh ïa ki shipai BSF kiba la kylla long pynban ki nongpynthut ïa ki paidbah nongleit-nongwan bad kiba la bat ruh naphang ïa ki kali kiba kit marbam-mardih ha Lad Bakli kaba dei ka lad ban leit sha Balat bad Ranikor bad kiba dei ki marbam-mardih ki ban leit buh sha ki ïew-ki hat ha ki thaiñ khappud kum sha Balat, Dangar, Ranikor bad Nongjri.
Ka seng da ka jingsngewkhia ka la ong ba kum ki shipai BSF ki dei ban ai ïa ka jingïada sha ki thaiñ khappud ban tehlakam ïa ka jinglaitlan ki nong Bangladesh pynban ki la wan ban ap sha ki lad bad lynti ban pynthut ïa ki kali jong ki paidbah ka thaiñ kiba kit ïa ki marbam-mardih.
“Kumno kum ki BSF ha ka jingshisha ka kamram jong ki, ka dei ban khmih ha khappud halor ka jingwan rung beaiñ jong ki khar Bangla hapoh kane ka Ri jong ngi hynrei kumba ka long mynta, kine ki BSF ki don ha lad Ranikor, lad Balat na ka bynta ban shimkhia ha ka ban khanglad ïa ki marbam kiba dei ban pynpoi ha ki ïew-ki hat kiba don ha ka thaiñ khappud”, ong ka seng.
Ka seng ka la ong ba lada ki shipai BSF ha ka jingtalasi ki lap ba ki mar kiba la kit ha ki kali ki dei ki mar kiba kum u drok, ki tiar pynbthei ne ki suloi, na ka liang ka seng kan ai jingïaroh ïa kitei ki shipai BSF hynrei kumba ka long pat kaba pynsngewsih ka long ba kitei ki shipai ki la bat pynban ïa ki marbam ha ryngkat ka jingdaiñ kuna ïa ki trai jong ki kali.
Shuh-shuh ka seng ka la pynpaw ïa ka jingsngewkhia halor ka jingïohrung laitlan ki nong Bangladesh lyngba ki shnong khappud kiba don hajan ka Bangladesh namar ka jingbym shimkhia ki shipai BSF, kumta ka seng ka la dawa ba dei ban buh da ki khyrdop talasi ne ki ‘Infiltration Check Gate’ ha kitei ki jaka khnang ban tehlakam ïa kano-kano ka jingrung beaiñ jong ki briew kiba nabar.
Halor kane ka jingpynsngew jong ka seng sha u MLA ka thaiñ, ka la dawa ba dei ban weng noh ïa ki shipai BSF kiba don ha lad Bakli bad na ka liang u MLA u la ong ba un sa shong pyrkhat shwa bad kiba halor khamtam ban ïakren bad u Myntri Rangbah ka Jylla, u Conrad K Sangma.
“Ngi kyrmen ba kine ki bor kin shimkhia halor jong kane ka bynta ïa kaba kin hap ban pyntikna ba u BSF um dei ban shong ha kato ka jaka hynrei u dei ban mih na katei ka jaka bad u dei ban peit ha ki thaiñ khappud”, bynrap ka seng.
Ka seng ka la ong ruh ba kumba ka paw mynta, kane ka jingleh jong ki shipai BSF ka pyni ïa ka jingsynjor ban tehlakam ha ki thaiñ khappud namar ha ki khyndiat bnai kiba la dep ruh la ïohi ba ki lah don kumba 7 ngut ki nong Bangladesh kiba lah shah kem ha Rilbong ha ki pulit jong ka nongbah Shillong.
Shuh-shuh na ka liang ka seng ka dawa ba dei ban pyntreikam biang ïa ka ‘Infiltration Check Gate’ kaba don hapoh ka shnong Umpung bad ruh ban buh sa kawei ka ‘Infiltration Check Gate’ hapoh ka shnong Dangar kum ka jingïada na ka jingrung laitlan ki barjylla ki bym lah ban ithuh la ki dei kiba nabar ka Ri ne na kiwei ki Jylla.
