Nongpoh, Risaw 09
Ka jingtih lum pathar da uwei u bar jylla uba dei na ka jaidbynriew Hmar, ïa uba la tip kyrteng kum u Donald Srinate ha Nongspung B jong ka Jirang konstitwensi, ka dei ka kam kaba la ïaid mynta lajan shisnem tam eiei. Hynrei ka jingkylli kaba mih ka long, naei utei u bar jylla u ïoh bor ban tih pynmadan kat ïa u lum haduh ba katto-katne ki paidbah nongshong shnong ki la duh ïa la ki ïing ki sem bad ki jingthung jingtep na ka jingtuid khyndew khamtam ha ka por slap?.
Haba pyrshang wad jingtip halor kane ka kam tih khyndew, u Rangbah Shnong ka Nongspung B, u Bah Philemon Tongper, u la ïathuh ba kam shym la don satia kano-kano ka jingai jingbit lane ka No Objection Certificate (NOC) ïa utei u bar jylla, la ka dei lyngba jong u kum u Rangbah Shnong ba mynta ne wat na u Rangbah Shnong barim ruh kumjuh. Kumba la don katto-katne ki lad pathai khubor kiba la thoh ba utei u Donald Srinate u dei na ka jaidbynriew Naga, u Bah Philemon Tongper u la pynshai ba utei u briew u dei na ka jaidbynriew Hmar bad um dei satia uba shong ba sah ha ka shnong Nongspung B, hynrei uba la shu wan thied ïa katei ka jaka khlem ka jingtip jong ka shnong.
Kum ban shu kdew, ha kine ki khyndiat sngi ba la dep, kumba san tylli ki longïing ha katei ka shnong ki la mad ïa ka jingeh kaba khraw hadien ba ki ïing ki sem ki jong ki lem bad ki jingthung jingtep ki la shah pynjot ha ka khyndew kaba la tuid na ka jingtih pynmadan ïa uwei u lum uba don marjan. Kane ka la pynlong ruh wat haduh ba katto-katne na kitei ki longïing ki la hap ban mih bad sah wai noh shawei namar ka jingshah pynjulor ka ïing ka sem ka jong ki ha kaba ki la dawa ruh ba utei u Donald Srinate u dei ban siew ïa ka baitlutksan jong ka jingshah pynjulor ki ïing ki sem bad ki jingthung jingtep ki jong ki.
