Shillong, Risaw 09
Ka kam tuh kam thiem ka dang ïai bteng na kawei ka sngi sha kawei pat. Dang ha kine ki sngi ruh la ïoh jingtip ba ki runar bym lah ban ithuh ki la ïoh biang ban tuh na kylleng ki jaka.
Katkum ka khubor kaba la ïoh na ki pulit la ong ba u Barryhok Kharbuli u la ujor ba ha ka janmiet jong ka 1 tarik mynta u bnai, ki runar bym lah ban ithuh ki la ïoh ban tuh ïa ka umphniang diesel haduh 200 liter na kawei ka mobile tower kaba don ha ka shnong Nongmalang ha South West Khasi Hills.
Ha kawei pat ka jingjia, ka khubor na ki pulit ka la ïathuh ba u Bah Wilson Tariang u la ujor ba ha ka 19 tarik mynshem bnai kata ha ka por kumba 11 baje mynmiet, ki runar bym lah ban ithuh ki la ïoh ban rong tuh ïa ki tiar ilektrik kiba shong dor haduh kumba T.4,79,294/- na kawei ka jaka ba don ka water pumping hapoh ka phyllaw jong ka Goldstone Cements Ltd.
Ha kawei pat ka khubor, u Kaushal Chandra Phular u la ujor sha ki pulit ba ha ka 7 tarik mynta u bnai, ki runar bym lah ban ithuh ki la tuh ïa ka arshaka ka jong u (ML05-Y-9260) na ka thaiñ Dhankheti, Shillong.
