Shillong, Risaw 09
Ki nonghikai SSA kiba don hapoh ka shatri jong ka All Meghalaya SSA School Teachers’ Association (AMSSASTA), ki la shim biang ïa ka rai ban ïai bteng ïa ka jingïakhih jong ki ha Madan Malki bad sngi bad miet tad haduh ba ka Sorkar Jylla kan phah da ka jingthoh sha ki namar ka jingdawa jong ki ka khlem pat urlong satia.
Kum ban shu kdew hangne, ka AMSSASTA ka la sdang ïa ka jingïakhih naduh ka 1 tarik u Risaw 2024, da kaba ki la pynlong ïa ka jingshong kyllaiñ mongor kaba khlem buh por ha madan Malki halor ka jingdawa na ka Sorkar Jylla ba ka dei ban kyntiew noh ïa ka tulop jong ki 100% namar ka la dap la 8 snem kynthih hynrei na ka liang ka Sorkar kam pat shym la pynkiew eiei satia ïa ka tulop jong ki.
Na ka liang jong kitei ki nonghikai ki la mih puk na madan Malki ha ka 9 tarik u Risaw 2024 hadien ba la wai ka jingïalang ba lyngkot ban leit sha Secretariat da ka jingthmu ban leit ïakynduh bad aiti da ka jingthoh ha u Myntri Rangbah ka Jylla, u Conrad K. Sangma bad Myntri ka tnat pule-puthi ka Sorkar Jylla, u Rakkam A. Sangma. Pynban mar ïa poi ha IGP kaba don mar pyrshah bad ka State Central Library, Shillong, kitei ki nonghikai ki la shah bat noh ha ki bor pulit bad kyrpad ïa ka synjuk ba kan shu jied tang katto-katne ngut ki nongïalam ban leit mih sha Secretariat. Ynda kitei ki nongïalam ki la poi ha Secretariat ki khlem shym la ïakynduh satia ïa u Myntri Rangbah ne wat ïa u Myntri ka pule-puthi.
Kitei ki nongïalam jong ka synjuk ki la ïathuh ba ka daw ba ki khlem shym la ïoh ïakynduh ïa kitei ki Myntri ka dei namar ba ka don ka jingshlei um ha Rilum Garo, kumta ki la hiar sha Garo bad kim don satia ha nongbah Shillong.
Na ka liang ki bor pynïaid distrik ki la ai jingmut ïa ki nongïalam jong ki nonghikai SSA ba kin leit ban ïakynduh noh ïa u Bah Paul Lyngdoh uba dei u nongaiktien jong ka Sorkar Jylla ha kaba ki la ïoh ka lad ban pynsngew ïa ki jingeh kiba kum ki nonghikai SSA ki la ïakynduh da ki phew snem.
Na ka liang u Bah Paul Lyngdoh u la phone ïa u Myntri ka tnad pule-puthi, u Rakkam A Sangma ha kaba na ka liang u Myntri u la ong ba ka Sorkar ka la rah ïa kane ka mat ha ka miej jong ka jingïakren bad ong ba na ka liang u Myntri Rangbah pat um shym la hun satia ïa ki katto-katne tylli ki mat kiba na ka liang u Myntri ka tnat pule-puthi u la pynkhreh. Kumta la hap ban pynjanai shuh-shuh bad na ka liang u Myntri ka tnat pule-puthi ruh u la dep ban leh ïa kata hynrei namar ba ka don noh ka jingshlei um ha Rilum Garo, ka la pynlong ïa kane ka mat ba kan sahteng.
“Ynda u Myntri Rangbah ka Jylla u la wanphai, na ka liang u Myntri ka tnad pule-puthi un sa ai ïa ka jingpynsngew bad kaei kaba mih nangta yn sa rah ha ka kynhun jong ki Myntri bad kin sa pyntip ïa ngi hynrei tad haduh kata ka por, ngi kum ki nonghikai ngi la rai ban don beit hangne bad sah miet la bad sngi tad haduh ba ngin da ïoh da ka jingthoh na ka Sorkar”, ong kitei ki nongïalam.
