Shillong, Risaw 10
U MLA ka North Shillong Constituency, Bah Adelbert Nongrum ha ryngkat ki nongïalam shnong bad ki ophisar ka tnat PWD ha ka 10 tarik u Risaw 2024, ki la leit ban jngoh ïa ka surok kaba la ai kyrteng ka ‘Long Round Road’ kaba don ha Mawlai Nongmali-3.
Ka jingleit jngoh jong u nongmihkhmat, ki nongsynshar shnong bad ka tnat PWD sha kane ka jaka ka long ban pynbha bad pyntreikam noh ïa kane ka surok kaba naduh u snem 2012-2013 ka bym shym la pynbha bad kaba la shu sahteng noh da kaba kyrmen ba ha kane ka kynti kaba mynta yn sa lah ban pyntyllun noh ïa ki kam shakhmat.
Haba kren ha kane ka sngi, u Bah Adelbert Nongrum u la ai khublei ïa ka MLA barim ka North Shillong, ka Kong Roshan Warjri kaba dei ruh ka Myntri jong ka Sorkar Jylla ha kato ka por kaba la wanrah ïa kane ka surok ban pynsuk ha ka leit-ka wan jong ki nongshong shnong.
U la ïathuh ruh ba hadien ba u la ïoh ïa ka jingjop ha ka ilekshon ha u snem 2018, u la buddien ïa kane ka kam hynrei ka jingpyntrei ïa kane ka surok ka dang sahteng namar ba ka don ka jingïatyngkhuh ha ka rukom pynïaid jong ka tnat PWD bad ka tnat khlaw ha kaba ki don ki kyndon kiba hap ban pan jingbit ym tang na ka Sorkar Jylla hynrei wat shaduh ka Sorkar pdeng ruh.
Na ka liang u General Secretary ka dong Mawlai Nongmali-3, u Bah Applestar Mawlong haba kren ha kane ka sngi, u la ong ba katei ka sngi ka dei ka sngi ban sah jingkynmaw ïa ka jingangnud bad ka jingthrang jong ki nongshong shnong jong katei ka dong kiba la shem jynjar ha ka leit-ka wan.
“Ka pyni mynta ba katno ngi thrang bad sliang ban shna noh ïa kane ka surok bad ngi ai khublei ïa u nongmihkhmat jong ngi bad ngi ngeit skhem ba kane ka kam kan ïaid beit-ïaid ryntih shakhmat”, ong u Bah Mawlong.
U Bah Mawlong u la kyntu ruh ïa u kontraktor ba un trei bha bad ban peit ïa ka long-ka man jong ka surok khnang ba kan pynhun ïa ki nongshong shnong namar ïa kane ka surok yn siang da ka dewbilat ba kan don ka jingneh slem ym ba kan neh tang shipor.
U Bah Mawlong u la kyntu ruh ban sdang noh kham kloi ïa kane ka kam khnang ba ki nongshong shnong jong kane ka dong kin lait na ki jingeh.
