Shillong, Risaw 10
Ka Khun Hynñiewtrep National Awakening Movement (KHNAM) hapoh ka jingïalam jong u Working President, Bah Thomas Passah ha ka Sngi Palei jong ka 10 tarik u Risaw 2024 ka la leit ban aiti da ka dorkhas ha ka ophis treikam jong u Director ka tnad Printing and Stationary ka Sorkar Jylla ban pynpaw ïa ka jingsngewkhia halor ka jingïaid lait jong ka tnad ban khot ‘tender’ paidbah.
Haba ïakren bad ki lad pathai khubor hadien ka jingwan ïakynduh ïa u Director jong kane ka tnad, u S R. Marak, na ka liang u Bah Thomas Passah u la ong ba ka seng ka la ïoh jingtip ba ka tnad Printing & Stationery ka la pynmih ïa ka ‘tender’ na ka bynta ki tiar ba la jot kiba khia kumba 14 haduh 15 ton ha kaba ïa kane ka ‘tender’ la ong ba ka dei ka jingkhot ‘tender’ ka bym pynpaw paidbah.
U la ong ba ka seng ka la ïoh jingtip ruh ba kumba la ju leh na ka por sha ka por, la ïohi ba la shu pynbna thok ha kaba ïadei bad ka jingkhang shwa ïa ka jingkhot tender ha ki tnad treikam bapher-bapher hynrei kane ka long tang ka jingleh shiliang khmat bad shah liang tang ban ïoh ai ïa ki briew jong kito kiba don ha ka bor bad ban phah ïa ki tender sha ki briew kiba la jied ban thied.
“Kumba la ju leh na ka por sha ka por haba pynbna paidbah ba la khang ïa ka ‘tender’, ki don ki briew longheh-longhaiñ ne ki nongmihkhmat jong ngi kiba la thmu lypa ban ai tang ïa ki briew lajong”, ong u Bah Thomas.
U la ong ba ki don ki MLA kiba pyrshang ban mushlia ïa kiwei ki tnad treikam jong ka Sorkar ban pynïoh kam ïa ki briew lajong da kaba ïaid lait na ki kyndon tang namar ba ki don ki ‘High Level’.
“Kane ka dei ka juk kaba lehse, ki khun samla jong ngi ki jynjar bha namar ïa ka kam Sorkar ruh kim ïoh, ban ïeng ha la ki jong ki kjat ruh ym long bad ban ïadon bynta ha kum kine ki jait ‘tender’ ban pyndap-pynbiang ha ka ïing-ka sem ruh lah don noh da ki ‘high level’ kiba la ap lypa lano ban ïoh ïa kane ka doh-kyndang”, ong u Bah Thomas.
Ha kaba ïadei bad kane ka bynta, na ka liang ka KHNAM ka la kyntu ïa ka tnad treikam ba ka dei ban khot ïa ka tender ha kaba ki paidbah kin lah ban thep bad ba kan long ka jingthep ‘tender’ da ka lynti kaba khuid bad ba suba khnang ba kan don ka jinghun na baroh ki liang.
“Na ka liang jong kane ka tnad kam dei ban shah rem ha ka jingshah pynbor jong ki nongmihkhmat ne ha ki ‘high level’ kiba don hajrong bad kane ka tender ka dei ban ïaid beit sha ki paidbah da ka lynti kaba khuid bad suba”, ong u Bah Thomas.
Shuh-shuh u Bah Thomas u la ong ba na ka liang ka seng kan dang ïai buddien halor kane ka kam lyngba ka jingwad da ka RTI bad lada kane ka tnad ka dang ïaid beit ïa ka jingkhot ‘tender’ khlem ka jingpynbna paidbah, kane kan pynpaw shai ba ka don ka jingbamsap kaba jur bha hapoh kane ka tnad treikam.
“Ha kino-kino ki tnar treikam ruh ba kin sngewbha ban khot bad pynïaid da ka lynti kaba khuid bad suba khnang ba kino-kino kiba dei hok ban ïoh kin ïoh ma ki”, bynrap u Bah Thomas.
