Shillong, Risaw 10
Ka Hima Khyrim kumba ju long man la u snem, kan pynlong ïa ka lehniam bad ka shad jong ka Hima kaba shisien shisnem kaba ju tip kum ka Pomblang Syiem ne Shad Nongkrem.
Ka Hima kan pynlong ïa kane ka lehniam ha Smit ha ka 11 bad 12 tarik Naiwieng.
Kane ka lehniam kaba shisien shisnem ka pyni ïa ka synshar-khadar ryngkat ka niam ka rukom, ka tem ka put bad ka shad ka kmen.
Ka dei ruh ka nguh ka dem ha U Blei Trai Kynrad ba un kyrkhu kyrdoh ïa ka Hima bad ïa ki khun ki hajar bad ka long ruh ka sakhi ïa ka jinglong kyrpang ka jaitbynriew.
