Mawkyrwat, Risaw 10
Ka KSU South West Khasi Hills District kum shi bynta ban wanrah ïa ka khuid ka suba ha kaba ïadei bad ka rukom thung kam thung jam lyngba ka District Selection Committee (DSC) ha ka janmiet Sngi Palei ka la leit ban ïakynduh ïa u Deputy Commissioner ka SWKHD, u Bah Barnari Mawlong.
Ha kane ka jingïakynduh ka seng hapoh ka jingïalam u samla Forwardman Nongrem, President KSU-SWKHD ka la ïoh ban aiti ruh ïa 15 tylli ki mat jingdawa haba ïadei bad ka thung kam thung jam hapoh ka DSC.
U samla Forwardman Nongrem haba ïakren bad ki lad pathai khubor u la ïathuh ba napdeng kine ki mat, ka seng ka kwah ban jur eh ka long ha kaba ïadei bad ki ‘Non- Official Member’ jong ka DSC kiba kynthup ïa u Vice-Chairman bad 2 ngut ki dkhot.
Halor kane ka bynta, u samla Forwardman u la ong ba ka seng ka dawa na ki bor distrik bad ka Sorkar kam dei shuh ban jied da ki briew kiba don jingïadei bad ki kam saiñ hima-sima hynrei dei ban jied da ki briew kiba lait na kane ka kam bad ki briew kiba la biang ka jingnang-jingtip.
Ka seng ka la dawa ruh ba dei ban pyni paidbah ïa ki ‘marks’ jong ki nongïakhun eksamin DSC bad ban wanrah noh ïa ki ‘Computer Based Test’ na bynta ki eksamin bapher-bapher, ban ai jingkheiñ ïa ki jingdon-jingem jong ki dkhot DSC katkum ka Meghalaya Public Servants (Furnishing of Information and Annual Return of Assets and Liabilities and the Limits of Exemption of Assets in Filing Returns) Rules, 2016.
Ka seng ka la ong ruh ba ki nongthep kam DSC ha Khasi-Jaiñtia ki dei ban nang bad tip ïa ka ktien Khasi ban kiar na ka kam thung kam shipor kum Adhoc/Contractual/Casual, ban buh lypa ïa ka por ne bnai jong u snem ban pynïaleh eksamin DSC, bad ban nym pynkylla ïa ki ‘Roll Number’ jong kiba aplai katba dang ïaid ka ‘Selection Process’.
Shuh shuh ka seng ka la dawa ban ai ïa ka ‘Carbon Copy’ jong ki OMR Sheet ha ki nongïakhun DSC, ban pynmih paidbah ïa ki jubab jong ki jingkylli hadien ki eksamin khnang ba ki nongïakhun DSC kin tip ïa ki jubab, ban pyndep ïa ka ‘Recruitment Process’ hapoh 6 bnai hadien ba la dep pyllait paitbah ïa ki jingpynbna, ban pynduh noh ïa ki ‘Personal Interview’ ha ki Grade – B, C & D, ban don ïa ka ‘Annual Report’ jong ka DSC, ban pyntikna ba kan ym don ka jinglait tuh jong ki jingkylli bad ban thaw ïa ka ‘Grievances Cell’ hapoh ka DSC. .
U samla Forwardman Nongrem u la ong ba ka seng ka khmih lynti ba ki bor distrik bad ka Sorkar ba kin shimkhia ïa kine ki mat jingdawa jong ka seng ban pynthikna ba ka thung kam thung jam hapoh ki distrik bad ha ka Jylla baroh kawei ka dei ban long kaba khuid ba suba ka ban lait na ka jingshah kynnoh bad ba nym don shuh ka jingleh tuh nangne shakhmat.
