Shillong, Risaw 10
Ka Congress kaba la phah ar tylli ki jingujor pyrshah ïa ki MLA phet seng, ka dang ap ïa u Lamphang ba un ai ka rai kaba kumno.
Ka Congress kaba don sa tang uwei u MLA mynta, ka la ujor pyrshah ïa ki lai ngut ki MLA jong ka kiba leit ïasoh bad ka National People’s Party (NPP) kaba ïalam ïa ka jingsynshar.
Ka Congress ka la phah ïa ki jingujor ha u Nailur ha kaba kawei ka dei pyrshah ïa ki MLA kiba la shah sospon bad kawei pat ka jingmudui ka dei ïa uwei u MLA uba leit pynïasoh bad ka NPP wat haba u dang ïashimbynta ha ki jingïalang jong ka seng.
Kane ka seng liang pyrshah ka la bnoh ïa ka jingkam ki MLA ha kaba ïadei bad ka shithi kaba 14 tarik Nailar 2024 ha kaba ki MLA ki la kam ba ki la dep phah ïa ka shithi sha u Lamphang ba ki la ïasoh bad ka NPP.
Haba ïakren bad ki nongïasaid aiñ ka Congress ki la ong ba u Lamphang u shim ïa ka por ban bishar bad ym lah ban shu pynslem than ban ai ïa ka rai.
Ki la ong ba ynda la ïohi ïa ka rai jong u Lamphang yn sa lah ban ong eiei kaba kumno ka sienjam yn sa shim.
Kum ban shu pynkynmaw, ki lai ngut MLA ka Congress kiba la phet sha ka NPP ki long u Dr Celestine Lyngdoh na Umsning konstitwensi, u Bah Gabriel Wahlang na Nongstoiñ konstitwensi bad u Bah Charles Marngar na Mawhati konstitwensi kiba la ïasoh bad ka NPP ha ka 19 tarik Nailar, 2024.
Kumba ka long mynta ka Congress ka don MLA sa tang marwei kata u Bah Ronnie V Lyngdoh uba dei ruh u MDC ka Congress na Mylliem.
