Shillong, Risaw 11
Wat la ka National People’s Party (NPP) ka dei ka seng saiñ pyrthei kaba bat ïa ka bor synshar ha ka jylla hynrei haduh mynta ym pat don ba nud ban pan tiket na ki saw tylli ki konstitwensi ha Shillong City District Committee na bynta ka ilekshon MDC sha Khasi Hills Autonomous District Council (KHADC).
Katkum ki khubor ba la ïoh lum la ïathuh ba ki konstitwensi kiba la thikna ban pynïeng kyrtong ki long tang ha ki ar tylli konstitwensi ba la don lypa ki MDC kum ha Malki-Laitumkhrah ban ïakhun da u Bah Fantin Lakadong bad ha Mawlai u Bah Teiborlang Pathaw.
Katba, ha kiwei saw tylli ki konstitwensi haduh mynta ym pat don ba pan tiket kiba kynthup ïa ka Jaïaw, Pynthorumkrah-Mawkhar, Laban-Mawprem bad Nongthymmai.
Ki tyllong khubor ki ïathuh ruh ba ka Shillong City District Committee kan sa phah noh ïa ka jingpyntip sha u Chairman ka NPP State Election Committee khnang ban ïoh ïa pyrkhat ïa kine ki konstitwensi ki bym pat don kyrtong.
Kane ka jingbymnud ban pan tiket kiba thmu kwah ïakhun na ka NPP ha kane ka ilekshon MDC ka lah ban dei ba ki tieng ïoh ki shah rem namar ka jingkyrshan tylli ki paidbah ïa u kyrtong ka Voice of the People Party ha kane ilekshon MP ba dang shu dep.
