Khliehriat, Risaw 11
Ka Khasi Students’ Union (KSU) East Jaiñtia Hills District ka la aiti da ka dorkhas sha u District Selection Committee (DSC) jong ka East Jaiñtia Hills District kaba dawa ban buh 17 tylli ki mat na bynta ban pynbha ïa ka District Selection Committee ne ka DSC jong ka distrik.
Ka KSU ka la dawa ban thung noh ïa u Vice-Chairman bad ki Non-Official Member ka DSC da ki bym don jingïadei bad ki seng saiñ pyrthei. Ki dkhot jong ka DSC ki dei ban pyllait paidbah ïa ki jingdon-jingem jong ki. Ki nongaplai ki dei ban long ki trai jylla bad ki dei ban nang ïa ka ktien Khasi ha la ki jong ki jong ki distrik.
Ka KSU ka la dawa ruh ba dei ban pynduh ïa ka jingthung kam Adhoc/ Contract/Casual bad la dawa ruh ban pyni paidbah ïa ki ‘marks’ jong ki nongïakhun eksamin DSC.
Ka seng ka la dawa ruh ba ïa ki ‘Roll Number’ jong ki kyrtong bad kino-kino ki jingkylla kim dei ban jia hapdeng ka jingpynrung kam bad ban pynbiang ïa ka ‘Carbon Copy’ jong ki ‘OMR Sheet’ ha ki nongïakhun DSC.
Nalorkata ban pyllait paidbah ïa ki jubab jong ki jingkylli ha ka por kaba biang khnang ba ki nongthep kin lah ban nujor ïa ka ‘Answer Sheet’ bad ban pyndep ïa ka ‘Recruitment Process’ hapoh 6 bnai naduh ka sngi ba la pynbna.
Nalorkata, ka KSU ka la dawa ruh ba dei ban pynduh noh ïa ka ‘Personal Interview’ ha ka Grade – B,C bad D bad ban don ïa ka ‘Annual Report’ jong ka DSC.
Shuh shuh ka KSU ka la dawa ruh ba dei ban pyntikna ba kan ym don ka jinglait tuh jong ki jingkylli bad ruh ban thaw ïa ka ‘Grievances Cell’ hapoh DSC bad ban wanrah noh da ki ‘Computer Based Test’ ha ki por ban wan kumjuh ban pynduh ïa ka ‘Internet’ ha ki por eksamin bad ban pyndait ïa ki CCTV hapoh ki Exam Hall.
