Nongstoiñ, Risaw 11
U President jong ka Meghalaya Pradesh Congress Committee (MPCC) u Bah Vincent H Pala u la ong ba don ki nongmihkhmat kiba pyrkhat tang ïalade, bad don kiba pyrkhat tang ïa ka san snem, bad don ruh ki nongmihkhmat kiba pyrkhat na ka bynta ka ri bad ka jaidbynriew hynrei ki paidbah hi kin sa ai ka jubab.
Ïa kane, na ka liang jong u Bah Vincent H Pala u la kren ha ka jingïalang pynshai paidbah halor ka jingphet seng jong lai ngut ki MLA na ka Congress ba la pynlong da ka Nongstoiñ Block Cong-ress Committee (NBCC) ha ka Sngi Thohdieng ha Market Complex, Nongstoiñ.
U Bah Pala u la ong, “Wat ong ba ka Congress ka la duh hadien ba la phet noh ki lai ngut ki MLA hynrei haduh mynta ka Congress ka dang khlaiñ ha kaba ki nongtrei bad nongkyrshan ki ïai neh ha kylleng ki jaka jong ka Jylla bad bun ki briew ki la phai khmat sha ka Congress.
Shuh shuh u Bah Pala u la ïathuh ruh ba na ka liang ka seng ka la dep ai ar tylli ki mukotduma pyrshah ïa ki 3 ngut ki MLA phet seng sha u Lamphang ka ïingdorbar thawaiñ ka jylla u Thomas A Sangma bad ong ruh ba lada u Lamphang um ai ïa ka rai, ka seng kan leit tied ïa ka jingkhang jong ka ïingbishar namar ka rukom phet seng ka jong kine 3 ngut, kam long ïahap namar kim shym la ïoh ne ïaid katkum ki kyndon ba la buh kata ban ïoh ïa ka 2/3 majority lane kata ka jingbun briew katkum ba la buh bad ki lah ban shah pynduh ïa ka jinglong MLA.
Une u Nongïalam ka Congress u la ong ba ki paidbah kim dei ban duh jingkyrmen, namar ka lah ban wan ka ilekshon MLA shiteng samoi.
Na ka liang jong u Bah Ronnie V Lyngdoh, u MLA ba la sah tang marwei jong ka Congress, haba kren ha katei ka jingïalang u la ther tyngeh ïa ki lai ngut ki MLA phet seng jong ka Congress da kaba ong ba ka jingphet seng jong kitei ki lai ngut ki MLA ka dei kaba la ïasuhbuit bad ka BJP na ka bynta ban pyntlot ïa ka Congress.
U Bah Ronnie u la ong, “Ka jingïaleh jong ngi ki paidbah mynta kam dei bad ki seng tit lane ki seng rit napoh kane ka jylla jong ngi, hynrei ka jingïakhun ka long beit pyrshah ïa ka BJP kaba dei ka seng kaba thmu ban pynkylla ïa ki riti synshar jong ka Ri ban ïoh synshar donbor da ki aiñ kiba long pyrshah ïa ka mon jong u paidbah.”
Ha katei ka jingïalang, nalor ki nongïalam bahakhmat jong ka Congress ha ka Jylla la ïadonlang ruh ki nongkitkam ka Mahila Congress, u Bah Erick Kharsyntiew President ka Nongstoiñ Block Congress Committee, u Bah B Nonglang President District Congress Committee bad kiwei kiwei.
