Shillong, Risaw 11
Ka Central Executive Committee jong ka Hill State People’s Demo-cratic Party (HSPDP) ka la thaw ïa ka State Election Committee na ka bynta ka ilekshon MDC sha Khasi Hills Autonomous District Council (KHADC) bad Jaiñtia Hills Autonomous District Council (JHADC).
Ïa kane ka Committee la thaw ha ka jingïalang ka seng kaba la long ha ka 9 tarik mynta u bnai bad la jied ïa u Bah K.P Pangniang uba dei u President ka HSPDP kum u Chairman.
Haba ïakren bad u Bah Pangniang, u la ïathuh ba baroh ki kyrteng jong ki kyrtong nongpan tiket jong ki konstitwensi ki dei ban phah beit sha ka State Election Committee hapoh ka 15 tarik u Naiwieng, 2024 ne lada slem palat kan dei hapoh ka 30 tarik u Naiwieng.
U la ïathuh ba ka jingshim rai ka long ba khlem da donkam shuh ban ïaid da ka District Committee namar ka por ka la lyngkot palat.
Haba kylli mano ban ïakhun na ka Rambrai Konstitwensi, u Bah Pangniang u la jubab ba un ïakhun hi, wat la u la rem ha ka ilekshon MLA hynrei un nym kynran dien namar u dang ieid ïa ki paidbah ka konstitwensi. “Wat la ki paidbah ki la kyntait ïa nga ha ka ilekshon MLA hynrei nga pat ngam kyntait ïa ki paidbah namar ki dang bun ki kam kiba nga hap ban pyndep,” ong u Bah Pangniang.
Kum ban shu pynkynmaw ka HSPDP ka la don lang ha ka RDA bad ka UDP. Hynrei la sngewthuh mynta ba kine ar tylli ki seng saiñ pyrthei ki lah ban ïaid noh la ka jong ha ka ilekshon MDC.
Ka HSPDP ka don ar ngut ki MLA kiba ïatreilang mynta ha ka Sorkar MDA 2 hapoh ka jingïalam ka NPP.
