Jowai, Risaw 11
Ka War East Elaka Satpator Fishing and Environmental Protection Association (WEESFEPA) kaba la seng na ka bynta ban pynneh-pynsah ïa ki dohum-dohwah kiba don ha ka Wah Lakroh, ka la ïeng ban pyrshah halor ka jingdie lilam ka Jaiñtia Hills Autonomous District Council (JHADC) bad maham ruh ban ym bahkhlieh lada jia eiei ïa ki.
Ïa ka WEESFEPA la seng da ka Syndai pyllun, Muktapur, Amlanai, Lakroh, Hawai Sutnga bad Hawai Bhoi, na ka bynta ban pynneh-pynsah ïa ki dohum-dohwah kiba don ha ka Wah Lakroh, namar lyngba kine, ki dohkha dohpnat kiba don ha kane ka wah ki paid nongshong shnong ki ïoh ban leit khwai man ka sngi, ba ki ïoh ban bam bad ki ïoh ruh ban die ban pyndap ïa ka jingdonkam jong ki ha ki ïing ki sem.
La seng ruh ïa ka na ka bynta ban lada ïa kane ka wah ban lait na ka jingpynïap pathar bad jingpynïap dusmon ïa ki dohkha dohpnat, da kaba ai bih, tongjar bad datding.
Ka seng ha u kyrwoh ba ka la phah, ka pynpaw ka jingsngewkmen ïa ka pynpynbna jong ka JHADC katkum ka Letter No. JHADC/MACF/11/2017/2/dated, Jowai, the August 2017, na ka bynta ban pynneh-pynsah ïa ki dohum dohwah ha ki wahbah wahrit bad kane ka jingpynbna ka la ai mynsiem shi kat dei eh ïa ka seng.
Hynrei ka seng ka pynpaw pat ka jingsngewlyngngoh ba mynta u snem ka JHADC ka la khot ‘tender’ biang ban die lilam ïa kine ki dohkha kiba don ha kane ka wah Lakroh, katkum ka Letter No. JHADC/MASF/M/10/2013/236, Dated Jowai, the 25th Sept, 2024.
Halor kane na ka liang ka seng ka la pynpaw ka jingpyrshah jur namar kan pynjot biang ïa kine ki dohum ki dohwah.
Ka WEESFEPA ka khot bad wer ïa ki paid nongshong shnong ban ïatreilang ban wanrah ka jingmyntoi ïa uba bun balang, khamtam u rit u ria, u duk u kyrduh, namar lada die ïa ka wah kin ïoh ban bam pahuh tang uwei, ar tang kiba biang ka lak ka klur jong ki.
