Shillong, Risaw 11
U Bah Amazing Kurbah uba la paw bha ha ka rynsan ïalap ilekshon ha Sohïong Konstitwensi bad mynta uba la rung ruh sha ka kam ak phlim Khasi, u la phla ba la don ka seng saiñ pyrthei kaba la wan tyrwa tiket ïa u ban ïakhun ïa ka ilekshon MDC hynrei u la rai ba un nym ïakhun namar u kwah ban long tang u nonghikai ïa ki paidbah.
Kane ka jingphla u Bah Amazing Kurbah ka dei haba ïakren bad U Nongsaiñ Hima haba ïadei bad ka jingïashimbynta jong u ha kawei ka jingrwai durkhih kaba ai kyrteng Shillong sha Dhaka na ka phlim Dhaka Escape, ha kaba u Bah Amazing u la ïoh ban shad lang bad ki nongïashim bynta ha kane ka phlim ryngkat u tyngshop bad puron.
U la ong, kumba u la kular ban nym ïakhun ïa ka ilekshon, u la rai ban nym treh ban shim ïa ka tiket wat la don kiba la wan tyrwa hynrei un long tang u nonghikai ïa ki paidbah kumno ban long kiba stad ban jied nongmihkhmat.
Ha kajuh ka por u la pynpaw ka jingsngewkmen ba u la ïoh ban shad ha ka jingrwai ka phlim ‘Dhaka Escape’ naba kane kan pynsahnam ïa u ha ki khun ki ksiew namar ïa kane ka phlim la wan ringdur sha Bangladesh.
Haba phai pat sha ka kam ilekshon, u Bah Amazing u la ong ba haduh mynta um pat lah ban rai la un mih pyrthei ne em ban ïalap ilekshon namar wat ka UDP kam pat lah ban pynithuh ïa u kyrtong ban ïakhun ïa ka ilekshon MDC.
U la ong ruh ba u kwah ba ki paidbah kin sngewthuh bha ban jied ïa ki nongmihkhmat namar ha ka por ilekshon ki paidbah ki klet haba wan ka pisa.
Kum ban shu pynkynmaw u Bah Amazing u la sdang ban ïoh ka jingithuh na ki paidbah ka dei hadien ba u la tbit ban kren bad ïalap ha ka ilekshon MLA ha Sohïong Konstitwensi haduh ba u kyrtong ka UDP Bah Synshar Lyngdoh kaba u la leit kyrshan u la ïoh ïa ka jingjop.
